Հայկն անդրադարձավ նաև մեկ այլ խոսակցության, ըստ որի, ինքը մասնագիտական կրթություն չունի, անգամ դպրոցը չի ավարտել: «Մինչև տասներորդ դասարան չեմ գնացել դպրոց, բայց դա չի նշանակում, որ կրթությունս կիսատ եմ թողել: Թիվ 153 դպրոցի ութերորդ դասարանն ավարտելուց հետո դուրս եկա և ընդունվեցի Ռոմանոս Մելիքյանի անվան երաժշտական դպրոցի դասական վոկալի բաժինը: Սովորել եմ նաև Երգի պետական թատրոնում: Ճիշտ է` Թատերական ինստիտուտը չեմ ավարտվել, բայց ոչ պակաս դպրոց եմ անցել:

Մասնագիտական կրթություն ստացել եմ «Հայֆիլմ» կինոստուդիայի դերասանի վարպետություն բաժնում: Սովորելով Հենրիկ Մարգարյանի կուրսում` շատ կարճ ժամանակում հասցրել եմ մասնագիտական մի շարք հմտություններ ձեռք բերել»,- ասաց սերիալային դերասանը՝ հավելելով, որ իր ուսուցիչը հիանալի մասնագետ է և կարողանում է իր ուսանողներին շատ գիտելիքներ տալ:

Հայկի հավաստմամբ՝ ամեն օր ինքնակրթությամբ է զբաղվում: «Թատերական ինստիտուտում սովորելու ցանկություն ունեի, բայց հասկացա, որ անիմաստ ժամանակ ու գումարներ եմ ծախսելու: Չկա հստակ գրականություն, որ այնտեղի դասախոսների հանձնարարությամբ պետք է կարդամ ու նոր բաներ սովորեմ: Այն, ինչ իրենք ինձ նոր պետք է սովորեցնեն, իմ դասախոսը` պարոն Մարգարյանը, արդեն սովորեցրել է: Մնացածը ձեռք կբերեմ ինքնակրթության և պրակտիկայի շնորհիվ: Ճիշտ է, դեռ սովորելու շատ բան ունեմ, բայց կարևորը լավ հիմքն է, որը կարծում եմ, ունեմ»:

Հիշելով դպրոցական տարիները, նա նշեց, որ լավ աշակերտ է եղել, մինչև չորրորդ դասարան աչքի է ընկել գերազանց առաջադիմությամբ: «Սկզբում շատ լավ էի սովորում, հետո ծուլացա :) Վարքի առումով միշտ լավ աշակերտ եմ եղել: Երբ ուզում էի դպրոցից դուրս գալ, տնօրենին՝ տկն Սարգսյանին, դժվարությամբ համոզեցի:) Թույլ չէր տալիս, ասում էր` կավարտես, հետո ուր ուզում ես գնա»,-Esem.am-ին ասաց սերիալային դերասանը: