Սիրահար զույգերը, ովքեր ցանկանում են օրինականացնել իրենց հարաբերությունները, մի շարք դժվարությունների են բախվում, որոնցից առաջինն արարողության ամսաթիվն է: Ե՞րբ է հարսանիք կազմակերպելու լավագույն ժամանակը: Շոգ ամռա՞նը, թե՞ ձյունոտ ձմռանը: Այդ հարցով NEWS.am STYLE-ը դիմել է միջոցառումների կազմակերպման գործում մասնագիտացած Event Service ընկերության տնօրեն Սոֆյա Սարգսյանին:
«Հայտնի է, որ բնությունը վատ եղանակ չունի: Բայց քանի որ դրսում գարուն է, առաջին հերթին հարկավոր է ընտրել հենց այս ռոմանտիկ տարվա եղանակը:
Որո՞նք են գարնանը հարսանիք կազմակերպելու առավելությունները:
Եթե որոշել եք ձեր հարսանիքը կազմակերպել հենց այս եղանակին, ապա ձեր բախտը բերել է, քանի որ.
• Բնությունը գարնանը հրաշալի է: Ամեն ինչ արթնանում է, կանաչում, ծաղկում, եւ դրա հետ մեկտեղ օդում չկա այնպիսի ճնշող շոգ եւ տոթ, ինչպես ամռանը:
• Որոշ ծաղիկներ միայն գարնանը կարելի է գտնել, օրինակ՝ գրեթե բոլոր երանգների քաջվարդ, յասաման, կակաչ:
• Գարունը նոր կյանքի սկիզբ է: Ինչո՞ւ ձեր ընտանեկան կյանքի պատմությունը չսկսեք հենց գարնանը:
• Գարնանը զարմանալիորեն ներդաշնակ է դիտվում մեղմ գույներով ձեւավորումը: Իհարկե, վառ հյութեղ գույները նույնպես միանգամայն շահավետ կլինեն:
• Գարնանը զբոսնելիս նաեւ քիչ հավանական է, որ զգեստը կկեղտոտեք որեւէ չհեռացվող բանով:
• Մայիսյան հարսանիք՝ դրախտային կյանք:
Սակայն հարկավոր է ուշադրություն դարձնել հետեւյալի վրա.
• Գարնանը, անխոս, եղանակը հրաշալի է, բայց եւ անկանխատեսելի: Դա վերաբերում է հատկապես ապրիլին:
• Տենդային շրջանը դանդաղ, բայց հաստատորեն սկսվում է գարնանը: Այդ պատճառով հարկ է պատրաստվել ոչ պակաս ակտիվությամբ, քան ամառային հարսանիքին. հարկավոր է նաեւ շտապ դիմում ներկայացնել ԶԱԳՍ, ռեստորան եւ հարսանիքի կազմակերպիչ ընտրել:
Ձեզ համար առաջնահերթություններ նշեք եւ դրանից ելնելով՝ ընտրեք հարսանիքի օրը: Երջանիկ հարսանիք եւ երկարատեւ համատեղ կյանք»: