Օքսֆորդի համալսարանի գիտնականները, փոխարինելով արատավոր գենը առողջ գենով, ինչ-որ չափով վերականգնել են այն մարդկանց տեսողությունը, ովքեր ունեին աչքի դեգեներատիվ հիվանդություն:
Մարդիկ, ովքեր անցել են բուժման այս պրոցեդուրան, որն իրենից ներկայացնում է ընդամենը մեկ ներարկում, ունեն կուրության ժառանգական մի տեսակ, որը կոչվում է խորոիդերեմիա: Այն հայտնաբերվում է մոտավորապես 50.000-ից մեկ մարդու մոտ: Այս մարդկանց տեսողությունն աստիճանաբար վատանում է և միջին տարիքում վերջնականապես կուրանում են:
Կլինիկական փորձաշրջանի առաջին փուլում խորոիդերեմիայով տառապող 6 տղամարդու (35-63 տարեկան) ներարկել են գենետիկորեն մոդիֆիկացված, անվնաս վիրուս (անվանումը՝վեկտոր), որը պարունակում է նորմալ, առողջ գենի կրկնօրինակը:
Գիտնականները հույս ունեին, որ այս ֆունկցիոնալ գենը կկանխի հիվանդների ցանցաթաղանթի բջիջների մահը:
Ներարկումներից 6 ամիս անց փորձարկում անցկացնող թիմը պարզել է, որ հիվանդների ցանցաթաղանթներն ավելի զգայուն են դարձել լույսի նկատմամբ, իսկ երկու հիվանդի տեսողությունը նույնիսկ էականորեն բարելավվել էր:
Սա գենային թերապիայի արդյունքները դիտարկելու առաջին ուսումնասիրությունն է: Սակայն հետազոտողները հավատում են, որ այս արդյունքները կարող են հետագայում կիրառվել ոչ միայն խորոիդերեմիայի դեպքում, այլև ավելի տարածված աչքի հիվանդությունների բուժման համար:
