Քլոե Քարդաշյանի անունը անմիջապես շրջանառվեց X-ում Օ Ջեյ Սիմփսոնի մահից հետո։ Այն բանից հետո, երբ լուրեր տարածվեցին, որ նախկին մարզիկը, որը մեղադրվում էր իր նախկին կնոջ եւ նրա ընկերոջ սպանության մեջ, մահացել է շագանակագեղձի քաղցկեղից, սոցցանցերի օգտատերերը սկսեցին «ցավակցել» 39-ամյա ռեալիթի հեռուստաաստղին՝ պնդելով, որ Սիմփսոնը նրա կենսաբանական հայրն է:
Չնայած ինքը՝ Սիմփսոնը, բազմիցս հերքել էր այս անհիմն լուրերը, Քլոեն թրոլինգի է ենթարկվել Instagram-ում եւ X-ում, որտեղ նրան «ցավակցել են» կորստի համար:
Քլոեն հրապարակավ չի մեկնաբանել խոսակցությունները։ Նա տեսանյութ է հրապարակել, որում մարզասրահում է՝ ցուցադրելով իր սլացիկ կազմվածքը. Քարդաշյանը կադրում սեւ շապիկով է եւ Fabletics-ի լեգինսներով:
Քլոեն Քրիս Ջեների եւ հանգուցյալ փաստաբան Ռոբերտ Քարդաշյանի կրտսեր դուստրն է: Վերջինը պաշտպանում էր Սիմփսոնին՝ 1995 թվականին նրա դատավարության ժամանակ:
Քլոեն ընդամենը ինը տարեկան էր, երբ Սիմփսոնը ձերբակալվեց իր նախկին կնոջ՝ Նիկոլ Բրաուն Սիմփսոնի եւ նրա ընկերոջ՝ Ռոնալդ Գոլդմանի սպանության կասկածանքով։
2009 թվականին Քլոեն ասել էր, որ Սիմփսոնին կոչում էր «Քեռի Օ Ջեյ», իսկ Բրաունին՝ «մորաքույր Նիկոլ»:
2019-ին Սիմփսոնը կտրականապես հերքեց, որ ինքը Քլոեի հայրն է:
«Ուզում եմ ընդգծել, որ Քրիսն ինձ ոչ մի կերպ չի հետաքրքրել ռոմանտիկ կամ սեքսուալ առումով, եւ ես նրա կողմից, նույնպես, երբեք հետաքրքրության որեւէ նշան չեմ տեսել»,-X-ում հրապարակված տեսանյութում ասել էր Սիմփսոնը:
Այդ ժամանակ Քրիսը, ով հերքում էր Սիմփսոնի հետ սեռական հարաբերություն ունենալը, ամուսնացած էր իր առաջին ամուսնու՝ Ռոբերտի հետ, իսկ Սիմփսոնը ամուսնացած էր Նիկոլի հետ, երբ իբր տեղի է ունեցել նրանց ենթադրյալ հանդիպումը:
Չնայած Քրիսը նախկինում խոստովանել էր, որ Ռոբերտին դավաճանել է ֆուտբոլիստի հետ, նա պնդել է, որ երբեք չի քնել Սիմփսոնի հետ:
