Ֆրանսիացի շանսոնյե Իվ Մոնտանը նրան անվանում էր «երեխայի աչքերով կին»: Մերլինի Մոնրոն 1950-ականների սեքս խորհրդանիշն էր եւ շարունակում է այդպիսին ընկալվել նաեւ մահվանից հիսուն տարի անց: Շատերին է հիացնում նրա ոճը, շքեղ մարմինը, տաղանդը: Մոնրոն ունի միլիոնավոր երկրպագուներ նաեւ հաջորդ սերունդների աստղերի թվում՝ Մեգան Ֆոկս, Մադոննա, Լինդսի Լոհան, Քրիստինա Ագիլերա եւ շատ ուրիշներ:

Պատահական չէ, որ նրա հայտնի «թռչող» սպիտակ զգեստը The Seven Year Itch («Յոթերորդ տարվա մարմաջը») ֆիլմից 2011 թ. վաճառվել է 4,6 մլն դոլարով, նույն թվականին Չիկագոյում հայտնվեց «Հավերժ Մերիլին» քանդակը, որի հիմքում նույն՝ «թռչող» զգեստի դրվագն է:

Իր սեքս խորհրդանիշ լինելուն նա հումորով էր պատասխանում. «Սեքս-խորհրդանիշն ընդամենը իր է, իսկ ես չէի ցանկանա իր լինել: Բայց, եթե առհասարակ պետք է լինել ինչ-որ բանի սիմվոլ, ուրեմն ավելի լավ է' սեքսի: Եվ հետո, տղամարդիկ ստեղծել են այդ կերպարն ու մտովի ավելին են պահանջում ինձնից, բաց ես կենսաբանորեն մյուս բոլոր կանանցից ոչնչով չեմ տարբերվում: Այսպիսով'ես չեմ արդարացնում տղամարդկանց երազները»:

Աշխարհի ամենահայտնի ձախլիկների շարքն անցած ամերիկացի կինոաստղ ու երգչուհի Մերիլին Մոնրոն (իսկական անունը' Նորմա Ջին Մոնտերսոն) ծնվել է 1926 թ. հունիսի 1-ին Լոս Անջելեսում:

Ասում են՝ Նորմա Ջինին այդպես են անվանել ի պատիվ այն ժամանակ հայտնի երկու դերասանուհիների' Նորմա Տոլմեջի և Ջին Հարլոուի:

Նորմայի մանկությունը հանգիստ ու երջանիկ չի եղել: Երկու շաբաթական Նորման հանձնվել է խնամատար ընտանիքի, որտեղ ապրել է յոթ տարի ու գրեթե չի տեսել հարազատ մորը. Գլեդիսը հազվադեպ է այցելել աղջկան: 1933 թ. մայրը ետ է վերցրել նրան, և միասին տեղափոխվել են Հոլիվուդ: Հենց այստեղ էլ փոքրիկ Նորման սկսել է հաճախ գնալ կինոթատրոններ. «Ես նստում էի այնտեղ ամբողջ օրը, երբեմն, նաև գիշերը: Մի փոքր երեխա հսկա էկրանի առաջ: Դա հիացնում էր ինձ, և ես մտապահում էի ամեն ինչ' որևէ մանրուք բաց չթողնելով»:

Բայց, ցավոք, շուտով Գլեդիսը ծանր դեպրեսիա տարավ, գրեթե խելագարվեց, ինչից հետո Նորմայի խնամքով սկսեց զբաղվել ընտանիքի ընկեր, սեփական երեխաներ չունեցող Գրեյս Մակկին: Նա սիրում եւ հիանում էր աղջկանով, սակայն շուտով ամուսնացավ ու Նորմային թողեց մի որբանոցում: Այդ տարիներին աղջնակի միակ ուրախությունը երբեմն կինո նայելու հնարավորությունն էր. «Ոչ, ես որբ չէի, որբերը ծնողազուրկ են լինում, իսկ ես գոնե գիտեի ծնողներիցս մեկին…. Բայց մայրս չէր ուզում ինձ, եւ ես ամաչում էի դրանից: Ուրախանում էի միայն այն ժամանակ, երբ ինձ կինոդահլիճ էին տանում : Ես սիրում էի կինո, իսկ կապույտ էկրանի աստղերին համարում էի իմ ընկերները»:

16 տարին լրանալուն պես Նորման, որոշելով առ միշտ հեռանալ որբանոցից, մի պլան մշակեց' ամուսնանալ առանց սիրելու: «Ընտրյալը» Ջեյմս Դոգերտին էր:

4 տարի անց զույգը բաժանվեց: Հենց այս տարիները նշանավորվեցին Նորմայի մուտքով Հոլիվուդ: Այդ ժամանակ նա աշխատում էր Radioplane Company գործարանում, որտեղ մի օր նրան գտավ լուսանկարիչ Դեւիդ Կոնովերը, ով մի քանի անգամ լուսանկարեց Նորմային և նկատեց, որ նա սարքի առաջ իրեն պրոֆեսիոնալ մոդելի պես է պահում: Հենց այսպես էլ սկսվեց վերջինիս մոդելային կարիերան:

Նրա բնութագրերն էին՝ հասակը'165 սմ, քաշը' 53 կգ, չափսերը' 91-61-86, մազերը' շեկ, գանգուր, աչքերը' կապույտ, ատամները' ճերմակ:

Շուտով Նորման պայմանագիր կնքեց 20th Century Fox-ի հետ, իսկ 1946 թ. նրան առաջարկեցին փոխել անունը, օրինակ՝ Մերիլին Լիոնի (կարճ' Մերի Լին): Բայց ի վերջո ընտրվեց Մերիլին Մոնրո անունը. «Նույն օրը ինչ-որ երեխաներ խնդրեցին իմ ստորագրությունը, բայց ես չգիտեի, թե ինչպես է գրվում «Մերիլին» բառը»,- հետագայում հիշել է նա:

1948 թ. Մոնրոն արդեն նկարահանվում էր հոլիվուդյան ֆիմերում, 1954 թ. ստացավ «Ամենահայտնի դերասանուհի» տիտղոսը, իսկ մեկ տարի անց հայտարարեց իր կորպորացիայի ստեղծման մասին' «Marilyn Monroe Productions»:

Գուցեև ճիշտ են ասում' ինչքան ավելի գեղեցիկ է կինը, այնքան ավելի փոքր է հասարակ կանացի երջանկության հասնելու հավանականությունը: Մոնրոյի անձնական կյանքը դժվար է ստացված անվանել: Մի առիթով հենց ինքն է ասել. «Ես սովոր չեմ երջանիկ լինել, այդ է պատճառը, որ սկսել եմ երջանկությունը չկարևորել»:
Կինոէկրանի աստղն այդպես էլ բավարարվեց զուտ կարիերայում ունեցած երջանկությամբ ու մի անգամ խոստովանեց. «Կարիերան հիանալի բան է, բայց այն երբեք չի կարող տաքացնել ցուրտ գիշերը»:

Նրա երկրորդ ամուսինը դարձավ նախկին բեյսբոլիստ Ջո դի Մադջիոն:

Զույգին միանգամից կնքեցին «տեր և տիկին Ամերիկա» անունով, բայց ամուսնությունը 1 տարուց էլ կարճ տևեց: Չնայած դրան' Մերիլինն ու Ջոն տղա ունեցան' Փոլ դի Մադջիոն: Ջոն անընդհատ զբաղված էր իր գործերով և ժամանակ չուներ ընտանիքի համար. հենց սա էլ բաժանման պատճառ դարձավ:

Երրորդ ամուսնու' Արթուր Միլլերի հետ համատեղ կյանքը ամենաերկարն էր' չորս տարուց ավել, բայց ոչ'ամենաերջանիկը:

Միայն բաժանությունից հետո պարզ դարձավ, որ ամուսնությունից ընդամենը շաբաթներ անց Միլլերն իր օրագրում մի գրառում էր թողել. «Ինձ թվում է, որ նա փոքր երեխա է: Ես ատում եմ նրան»: Այս գրառումը Մոնրոն տեսել էր, վիճել էին: Միայն բաժանվելուց հետո Մերիլինը հայտարարեց. «Կարծում եմ, որ նա ամենալավ գրողն է, բայց ոչ ամենալավ ամուսինը»:

Միլլերի հետ բաժանումը Մոնրոն հեշտ չտարավ: Երկար ժամանակ բուժվեց հոգեբուժարանում, որտեղ նրան տեղավորել էին մենախցում, և, եթե չլիներ նրա հետ կապը չխզող ու թերևս դեռ սիրող Ջո դի Մադջիոն, նա, անշուշտ, կգժվեր: Բայց Ջոն դուրս բերեց նրան այդտեղից:

Հետո Մերիլինը կարճատև արկած ունեցավ Ֆրանկ Սինատրայի հետ, ով հայտնի կնամոլ էր: Ինչպես Մոնրոն է ասել հետագայում, «տղամարդիկ լավն են անկողնում միայն այն ժամանակ, երբ դավաճանում են»: Ֆրանկն էլ էր դավաճանում, հետևաբար, ամեն ինչ շատ արագ ավարտվեց: Այդ ժամանակ Մերիլինը նորից հայտնվեց հիվանդանոցում: Այս անգամ պատճառը հոգեվիճակը չէր. նա ծանր վիրահատություն տարավ' հեռացրեցին լեղապարկը:

Մոնրոյի կենսագիրները պնդում են, որ 1951 թ. նա ծանոթացել է Ջոն Քենեդու հետ, և նրանց միջեւ սիրային կապ է եղել:

Ասում են նաև, որ Մերիլինը բավական ջերմ հարաբերություններ է ունեցել նաև Ջոնի եղբոր' Ռոբերտ Քենեդու հետ: Այս խոսակցություններն ապացուցել դժվար է, բայց Մոնրոյի շատ երկրպագուներ, ովքեր համարում են, թե դերասանուհուն իրականում սպանել են, նրա մահվան պատճառը փնտրում են այս երկու մարդկանց միջավայրում:

Իրականում հարցին, թե ինչն էր Մոնրոյի մահվան պատճառը, պատասխանելը դժվար է: Բժշկական հետազոտության արդյունքը խոսում է քնաբերի չարաշահման միջոցով կատարած ինքնասպանության մասին: Սակայն բացի այս երկու կարծիքներից կան բավական տարածված ևս երեքը՝ սպանություն մաֆիայի կողմից, թմրանյութի չարաշահում, անձնական հոգեբան Ռալֆ Գրինսոնի թույլ տված ճակատագրական սխալ' օգտագործել քլորալհիդրադը էյունեմբուտալից անմիջապես հետո:

Որ տեսակետն է ավելի իրական' պարզ չէ, բայց կա մի հստակ իրողություն: Այն բանից հետո, երբ հայտարարվեց, թե Մերիլին Մոնրոն կյանքին վերջ է տվել ինքնասպանությամբ, Ամերիկայում գործեց «Վերթերի էֆեկտը». հարյուրավոր երիտասարդներ հետևեցին Մոնրոյի օրինակին...

Կինն ընդամենը երկու զենք ունի' թարթիչաներկ և արցունքներ, բայց երբեք չի կարող միաժամանակ երկուսն էլ օգտագործել :

Չեմ նեղանում, երբ ասում են, որ ես հիմարիկ եմ, որովհետև գիտեմ, որ դա այդպես չէ:

Ուշանալ նշանակում է համոզվել, որ քեզ սպասում են, որ սպասում են միմիայն քեզ, և որ դու անփոխարինելի ես:

Շներն ինձ երբեք չեն կծել, միայն' մարդիկ:

Ուժեղ տղամարդը կնոջ հաշվին ինքնահաստատվելու խնդիր չունի:

Չգիտեմ' ով է ստեղծել բարձրակրունկը, բայց ամբողջ աշխարհի կանայք նրան պարտական են:

Լավ համբույրն արժի ևս մեկին:

Երջանկությունը փողի մեջ չէ, այլ գնումների:

Երբեք ետ մի գնա նրա մոտ, ումից հեռացել ես, անգամ եթե քեզ խնդրում են կամ ինքդ ես ուզում: Գրավելով մի բարձունք՝ սկսիր գրոհել մյուսը:

Ի՞նչ եմ հագնում ես քնելիս, իհարկե, «Շանել համար 5»:

Ես սիրում եմ հագնել շքեղ զգեստ կամ ընդհանրապես մերկ մնալ: Միջինն ինձ համար չէ:

Ցանկացած աղջիկ միշտ պիտի հիշի, որ իրեն պետք չեն նրանք, ում պետք չէ ինքը:

Միլիոնների երազանքը չի կարող միայն մեկին պատկանել: