Շանհայի հետազոտողների խումբը հայտնաբերել է կերատիտի (աչքի եղջերաթաղանթի բորբոքում) գենոմի խմբագրման վրա հիմնված բուժման նոր մեթոդ, հայտնում է Shanghai Daily-ն:
Կերատիտը կարող է հայտնվել 1-ին տիպի պարզ հերպեսով վարակվելուց հետո: Եղջերաթաղանթի վարակը կարող է առաջացնել հերպեսային կերատիտ, ինչը 85% դեպքերում հանգեցնում է կուրության: Հետազոտության գլխավոր հեղինակ, բժիշկ Հոնգ Ցզյասուն նշում է, որ այս տիպի հիվանդությունն է Չինաստանում կուրության դեպքերի մոտ կեսի պատճառը։
«Ժամանակակից դեղամիջոցները միայն օգնում են վերահսկել ախտանշանները, որոնք հնարավոր չէ վերացնել, քանի որ վիրուսը թաքնվում է նյարդային համակարգի ներսում։ Նույնիսկ այն ժամանակ, երբ մարդկանց եղջերաթաղանթի փոխպատվաստում են կատարում, կարող է տեղի ունենալ ռեցիդիվ: Միակ բուժումը վիրուսի գենոմի դեգրադացիան է»,- ասել է Հոնգը:
Գիտական ապացույցների համաձայն՝ գենոմի խմբագրումը ոչնչացնում է վիրուսը՝ ռեցիդիվի հնարավորություն չթողնելով: Հաղորդվում է, որ մկների վրա հաջող փորձարկումներից հետո իրականացվել են մի շարք փորձեր՝ օգտագործելով մարդկային դոնոր եղջերաթաղանթները: Նշվում է, որ փորձերը դրական արդյունքներ են տվել:
Պարզ հերպեսի վիրուսը (HSV) աշխարհում մարդու ամենատարածված պաթոգեններից մեկն է: Երկրագնդի բնակչության շուրջ 97% -ն այս վիրուսի կրողներն են, որը կարող է թաքնվել նյարդային համակարգի ներսում: Մինչ օրս դրա բուժման համար պատվաստանյութ կամ դեղամիջոց չկա:
