Global arts international-ը նոյեմբերի 21-ին Լոս Անջելեսում կազմակերպում է «Thank you, հայրիկ» ֆիլմի ամերիկյան պրեմիերան: «Արմենպրես»-ի փոխանցմամբ՝ նույն օրը ընկերության նախաձեռնությամբ նշվելու է ՀՀ վաստակավոր արտիստ Միքայել Պողոսյանի 60-ամյակը, թեև վերջինս այն տո նել է ընթացիկ տարվա մայիսի 31-ին:
Նախքան ամերիկյան պրեմիերան` «Thank you, հայրիկ» կինոնկարը գնահատել է ոչ միայն երևանաբնակ հանդիսատեսը, այլև ռուսաստանյան «Պատուհան դեպի Եվրոպա» կինոփառատոնի ժյուրին: «Thank you, հայրիկ»-ը ճանաչվել է համատեղ արտադրության լավագույն ֆիլմ և արժանացել կինոփառատոնի գլխավոր մրցանակին:
Վերադարձ դեպի արմատներ և ազգային ինքնության բացահայտում. ահա այս գաղափարներն են ընկած «Thank you, հայրիկ» ֆիլմում:
Ֆիլմի սկսելուն պես էլ «շնորհակալություն, հայրիկ» արտահայտությունը, թերևս, ամենից հաճախ օգտագործվողն է, սակայն գլխավոր հերոսուհին` Վերջինեն (Վիրջին), ամեն անգամ հանգուցյալ հորը հիշատակելիս դա անում է ոչ թե մեծ սիրուց, այլ ատելությունից դրդված: ԱՄՆ-ում ծնված և ամերիկյան հոգեկերտվածք ունեցող Վիրջիյի համար Հայաստանն ու հայ լինելը բառերի հերթականությունից բացի, ուրիշ ոչինչ չէր նշանակում, ավելին` ոչ էլ դրանց իմաստը զգալու և հասկանալու ցանկություն ուներ:
Սակայն հոր կտակի համաձայն` 50 միլիոնը ժառանգելու համար նախ պետք է ամուսնանա հայի հետ, և ամենակարևորը` վերջինիս անունը պետք է լինի Բարգևոս, որը նրա պապի անունն էր: Հոր նամակի հետքերով և Բարգևոսին վերջապես գտնելու մեծագույն ցանկությամբ Վիրջին գալիս է Հայաստան և ծանոթանում հայկական ավանդույթներին, հայերին բնորոշ` մարդկանց հետ շփվելու պարզությանը, ջերմությանը և Բարգևոսի հետ, ում կերպարը մարմնավորել է ՀՀ վաստակավոր արտիստ Միքայել Պողոսյանը:
Ֆիլմի ռեժիսորն է Հրաչ Քեշիշյանը, սցենարի հեղինակներն են Միքայել Պողոսյանը և Վիգեն Ստեփանյանը, օպերատորը՝ Արթուր Ղարայանը: Վիրջիյի դերում նկարահանվել է ԱՄՆ-ից ժամանած, իտալական ծագում ունեցող Քրիստա Դոնարգոն: Դերերում հանդես են գալիս Միքայել Պողոսյանը, Վիգեն Ստեփանյանը, Լուիզա Ղամբարյանը և այլք: Ֆիլմն արտադրել են Team Production-ը, Mars Media Entertainment-ը և Հայաստանի ազգային կինոկենտրոնը:
