«Վիտեբսկ 2014» մանկական երաժշտական միջազգային մրցույթի երրորդ մրցանակը բաժին է հասել Հայաստանի ներկայացուցիչ 10-ամյա Միկային: Փոքրիկն արժանացել է նաև հազար դոլար դրամական պարգևի: Ինչպես տեղեկացնում է «Արմենպրես»-ը՝ վկայակոչելով «Սլավյանսկի բազար» փառատոնի պաշտոնական կայքը, Գրան պրի մրցանակին և 5 հազար դոլար պարգևին է արժանացել Ուկրաինայի ներկայացուցիչ Անաստասիա Բագինսկայան:
Բելառուսի Վիտեբսկ քաղաքում հուլիսի 8-16-ը անցկացվող «Սլավյանսկի բազար» արվեստների միջազգային փառատոնի շրջանակներում անցկացվել են «Վիտեբսկ 2014» էստրադային երգի կատարողների և «Վիտեբսկ 2014» մանկական երաժշտական միջազգային մրցույթները: Այս երկու մրցույթներին էլ Հայաստանը ներկայացնելու համար Վիտեբսկ էին մեկնել 28-ամյա Տիգրանուհի Շահինյանը և 10-ամյա Միկան:
«Սլավյանսկի բազար» արվեստների միջազգային փառատոնի հանդիսավոր բացումը տեղի է ունեցել հուլիսի 10-ին Վիտեբսկում: Երեկոյի ընթացքում ելույթ են ունեցել հայտնի ռուս, բելառուս և ուկրաինացի երգիչ-երգչուհիներ, հատուկ հյուրեր այլ երկրներից, այդ թվում՝ «Եվրատեսիլ 2009»-ի հաղթող Ալեքսանդր Ռիբակը: Երեկոյի ընթացքում հանրությանն են ներկայացվել նաև երկու մրցույթների մասնակիցները:
«Վիտեբսկ 2014» մանկական միջազգային մրցույթն անցկացվում է 12-րդ անգամ, իսկ «Վիտեբսկ 2014» միջազգային էստրադային երգի կատարողների մրցույթը՝ 23-րդ:
