ԱՄՆ-ից աստղային հրուշակագործ Ֆլորա Աղաբաբյան. «Սեր՝ ահա իմ գաղտնի բաղադրամասը»

18:17 - 9.Հունվար.2020

«Երբ փոքր էի, շատ էի ցանկանում վհուկ-հոբիթ դառնալ: Հիմա մոգություն եմ անում խմորից եւ շաքարից: Ես դա ոչ մի այլ բան հետ չէի փոխի: Ես դրա մեջ մեծագույն բավարարվածություն եւ ուրախություն եմ գտնում»,- NEWS.am STYLE-ի հետ հարցազրույցում ասաց ԱՄՆ-ից լեգենդար հրուշակագործ Ֆլորա Աղաբաբյանը: Նրա աղանդերները արվեստի ստեղծագործություն են, նրա մոտ հերթագրվում են անգամ հայտնիները: Քիմ Քարդաշյանը Ֆլորայի տորթերի մեծ սիրահարն է: Էլ չխոսենք Դոնալդ Թրամփի մասին: Ավելացնենք, որ Նեւադայի Ռեստորանների ասոցիացիան Ֆլորային է շնորհել 2019 թվականի Շեֆ հրուշակագործի կոչումը: Ընդ որում՝ նա աներկբայորեն հավատում է՝ միշտ չէ, որ մենք ենք ընտրում մեր մասնագիտությունը կամ կարիերան, երբեմն նա է ընտրում մեզ:

Դժվա՞ր էր ԱՄՆ-ում իրականացնել սեփական երազանքը:

Ես երազում եմ, հավատում ու անում, եւ այն մշտապես կատարվում է... Ամեն օր ստեղծելը եւ որեւէ մեկի գաղափարն իրականություն դարձնելն ինձ համար մեծ մարտահրավեր է: Օրվա վերջին, եթե ամեն ինչ հրաշալի է, բոլորը երջանիկ են, դեմքերը փայլում են, ապա դա ինձ համար ամենամեծ պարգեւն է: Պատահում է, որ հարսանեկան տորթն այնքան գեղեցիկ է, որ հարսնացուն ափսոսում է կտրել: Երբեմն հարսանեկան տորթի միայն մի մասն է հյուրերին մատուցվում:

Եթե օրվա ընթացքում ինչ-որ նոր բան չի ստեղծվում, այնպիսի զգացում եմ ունենում՝ ասես ինձ չեմ արտահայտել: Նույնիսկ 12-ժամյա աշխատանքային օրից հետո:

Ձեր տորթերը արվեստի ստեղծագործություն են, ինչպե՞ս եք դրանք ստեղծում:

Յուրաքանչյուր օրը մեզ ինչ-որ նոր բան ստեղծելու հնարավորություն է ընձեռում:

Ի՞նչն է Ձեզ ոգեշնչում:

Ոգեշնչումը գալիս է ցանկացած գործոնից՝ օրվա եղանակից, բնությունից, ջրից, երեխաներից, մարդկանցից, անհատականություններից... Դուք կարող եք ամեն ինչով ոգեշնչվել... Պարզապես պետք է ինքնավստահ լինես եւ հավատաս... Հավատացեք նրան, ինչի մասին մտածում եք, նրան, թե ինչպես եք տեսնում, ինչպես եք մտածում, ինչ եք ցանկանում, ջանասիրաբար աշխատեք... Հաջողությունը գալիս է մշտական աշխատանքի շնորհիվ եւ ձեզ կհետեւի՝ անկախ ամեն ինչից:

Դուք հայտնի անձանց սիրելի հրուշակագործն եք, ինչպես՝ Դոնալդ Թրամփի, Քիմ Քարդաշյանի: Դժվար չէ՞ նրանց համար տորթեր թխել:

Ո՛չ, ամենեւին դժվար չէ: Ես մեծագույն հաճույքով եմ տորթեր պատրաստում բոլոր մարդկանց համար, ոչ միայն հայտնիների: Բոլորին միատեսակ եմ վերաբերվում եւ փորձում եմ տորթերի միջոցով փոխանցել իմ սերը: Սերը իմ ունիվերսալ գաղտնի բաղադրամասն է: Կյանքում ես առաջնորդվում են երեք սկզբունքով՝ լինել հոգատար, սիրող եւ միշտ մարդկանց օգնել՝ որքան հնարավոր է: Հենց այս պատճառով իմ աղանդերները ստեղծելիս ձգտում եմ, որ մարդիկ մտապահեն երջանկության պահերը: Աշխարհում անչափ մեծաթիվ են խնդիրներն ու դժվարությունները: Հրուշակագործական արվեստը մարդկանց օգնում է թեկուզ ինչ-որ ժամանակով մոռանալ հոգսերի մասին: Ընդհանրապես, կարծում եմ, որ ազգի համախմբվածությունը սկսվում է ուտելիքից եւ առողջ կյանքից, ընդ որում՝ անհրաժեշտ է կարողանալ պահպանել դրական մտածելակերպը եւ մշտապես համեստ մնալ: Կարեւոր չէ՝ ով ես դու կամ ինչով ես զբաղվում, կարեւոր է մարդ լինել, ումից կարելի է սովորել եւ ումով կարելի է ոգեշնչվել:

Դուք 2019 թվականի Շեֆ հրուշակագործն եք, ի՞նչ է դա Ձեզ համար նշանակում:

Անկեղծ ասած՝ այդ անվանակարգն ինձ համար մեծ անակնկալ էր: Դա մեծագույն պատիվ է: Ես անչափ շատ եմ աշխատել, բայց չէի մտածում, որ կարող եմ այդպիսի բարձունքների հասնել...

Կցանկանայի՞ք արդյոք սեփական խոհարարական դպրոց բացել:

Իհարկե, շատ կցանկանայի: Ես հիմա հենց այդ գործընթացի մեջ եմ եւ հույս ունեմ, որ շուտով կկարողանամ իմ փորձն ու գիտելիքները փոխանցել տաղանդավոր եւ կրեատիվ երիտասարդներին: