«Եվրատեսիլ-2016»-ի ողջ նախապատրաստական եւ մրցութային ընթացքում հայ պատվիրակ Իվետա Մուկուչյանը կհամագործակցի Kivera Naynomis նորաձեւության տան հետ: Այս մասին տեղեկացնում են Առաջին ալիքի հասարակայնության հետ կապերի բաժնից: Ինչպես բեմական, այնպես էլ նշանակալի միջոցառումների որոշ հագուստները կստեղծվեն հայկական նորաձեւության տանը:
Ի դեպ, սա նրանց առաջին համագործակցությունը չէ: 2013 թ-ին Իվետան տվյալ ապրանքանիշի Red Collection հավաքածուն ներկայացնողներից մեկն էր:
Kivera Naynomis նորաձեւության տան հիմնադիր, գլխավոր դիզայներ Արեւիկ Սիմոնյանի խոսքով՝ «Եվրատեսիլ-2016»-ի շրջանակներում Kivera Naynomis-ի հետ աշխատելու վերջնական որոշումն, իհարկե, ուրախացրել է իրեն: « Իվետան իր կերպարով շատ համահունչ է մեր բրենդին, նա լավագույնս մարմնավորում է Kivera Naynomis կնոջ նկարագիրը, բացի այդ միշտ էլ հաճելի է աշխատել դրական էներգետիկայով օժտված, շփման մեջ բաց ու թեթև մարդու հետ, ինչը եւս գնահատելի է մեր բրենդի համար: Մենք էլ մեր կողմից կանենք ամեն ինչ՝ լավագույն արդյունք ստանալու համար»,- նշել է Արեւիկ Սիմոնյանը:
«Եվրատեսիլ-2016»-ի հայաստանյան ներկայացուցիչ Իվետա Մուկուչյանին եւս շատ ոգեւորել է այս համագործակցությունը: «Վստահ եմ, որ ապահով ձեռքերում եմ եւ հույս ունեմ, որ հանդիսատեսին դուր կգան նաեւ իմ հագուստները»- նշել է Իվետան:
«Եվրատեսիլ-2016»-ի հայաստանյան երգի եւ տեսահոլովակի պրեմիերան կկայանա մարտի 2-ին: Իվետա Մուկուչյանն այս տարի եվրատեսիլյան բեմում կկատարի “LoveWave” ստեղծագործությունը, որի երաժշտության համահեղինակները Լեւոն եւ Լիլիթ Նավասարդյաններն են, խոսքերի համահեղինակներ՝ Իվետա Մուկուչյան եւ Սթեֆանի Քրաթչֆիլդ:
«Եվրատեսիլ-2016»-ը կկայանա մայիսի 10-ին, 12-ին եւ 14-ին Շվեդիայի մայրաքաղաք Ստոկհոլմում: Հայաստանի ներկայացուցիչը ելույթ կունենա 1-ին կիսաեզրափակիչ փուլի ընթացքում: Այս տարի «Եվրատեսիլ»-ին կմասնակցեն 43 երկրների ներկայացուցիչներ: Մրցույթի այս տարվա կարգախոսն է Come together (Միավորվենք):
