Դերասանուհի, հաղորդավարուհի Դիանա Մալենկոն շուտով կդառնա 20 տարեկան: Չնայած երիտասարդ տարիքին՝ նա սահուն քայլերով առաջ է գնում իր կարիերայում: Վերջերս 21TV-ից հեռացած Դիանայի հետ խոսել ենք գործունեության, համարձակության, անձնական կյանքի և ոչ միայն այդ ամենի մասին:)
Կրթություն
Դիանան սովորում է թատերական ինստիտուտի Արվեստի կառավարման բաժնում, 3-րդ կուրս է: Հաղորդավարուհին խոստովանում է, որ վերջին շրջանում գերծանրաբեռնված գրաֆիկի պատճառով հաճախ է բաց թողնում դասերը: «Անվճար համակարգում էի սովորում, բայց փոխադրվեցի վճարովի, որովհետև իսկապես չէի հասցնում, բացականերս շատ-շատ էին»,- նշեց դերասանուհին, ում խոսքով՝ քննությունները, այնուամենայնիվ, լիարժեք հանձնում է:
Անդրադառնալով իր ընտրած 3 մասնագիտություններին՝ հաղորդավարություն դերասանություն և արվեստի կառավարում, նա ասաց. «Մի պատսախան եմ մտածել, որը շատ դիպուկ է. ոտքերս, որոնք ինձ առաջ են տանում՝ հեռուստատեսությունն են, թատրոնը սիրտ-անոթային համակարգս է, որը լցնում է, Արվեստի կառավարումը գլխուղեղս է, որը կառավարում է ամեն ինչ: Հետագայում, երբ հեռուստատեսության համար արդեն ծեր կլինեմ, թատրոնում գուցե քիչ դերեր խաղամ, այս ոլորտոմ երկար տարիներ աշխատած մարդու համար ճշտագույն մասնագիտությունը կլինի արվեստի կաավարումը»:
Թատրոն
Դերասանուհին թատրոն ընդունվել է հեռուստատեսությունում աշխատելուց հետո: «Եթե ինձ հարցնեն՝ ֆինանսապես ի՞նչ է ինձ տալիս թատրոնը, կասեմ՝ ոչինչ: Աշխատանքիս դիմաց գուցե վարձատրվում եմ, բայց այն ինձ համար ֆինանս վաստակելու միջոց չէ: Թատրոնը շատ ժամանակատար է, բայց ես շա՜տ-շատ եմ սիրում այն»,- ասաց նա ու հավելեց, որ առանց 1 տոկոս ակնկալիքի նվիրված է թատրոնին: «Ուղղակի չեմ կարող առանց թատրոնի միջավայրի, բեմի»,- ավելացրեց Դիանան: Նրա խոսքով՝ այն շատ բան է փոխել իր կյանքում՝ մտածողության, հորիզոնների առումով:
Դիանան չի վախենում փորձարարությունից թատրոնում, նախորդ տարի նա նույնիսկ տղայի կերպարով ներկայացավ: «Ապագա պլանների մասին դեռ չեմ խոսի, քանի որ Շեքսպիրի «12-րդ գիշերը», որը փետրվարի 15-ից կրկին խաղալու ենք, վերջերս ենք հանձնել: Չեմ վախենում համարձակ դերեր խաղալ, օրինակ, հենց տղայի կերպարն ինձ համար շատ հետաքրքիր էր: Այն, որ իմ էնտուզիազմը, համարձակության դրսևորումները կան, բոլորը գիտեն»,- ասաց դերասանուհին ու հավելեց, որ իր համար առավել հետաքրքիր են խարակտերային դերերը, որոնց միջոցով նաև ինքն իրեն է բացահայտում:
Ֆիլմեր
«Ես թատրոնի դերասանուհի եմ, ով գուցե հանդես գա գեղարվեստական ֆիլմերում, բայց ոչ հեռուստասերալներում: Մոտ 3-4 տարի է՝ անդադար առաջարկներ եմ ստանում՝ մեծ կամ փոքր գումարներով, գլխավոր կամ երկրորական (հիմնականում՝ գլխավոր) դերերով, գրավիչ առաջարկներ՝ սերիալում նկարահանվելու դեպքում, սակայն դա ինձ չի գրավում, քանի որ ես սիրում եմ դերասանությունը թատրոնում»:
Ըստ Դիանայի՝ ֆիլմերում նկարահանվելու առաջարկներ ունի: 90-ականների մասին պատմող նոր ֆիլմում դերասանուհին մարմնավորում է գլխավոր կերպարներից մեկին՝ 20-ամյա մի աղջկա: «Նկարահանումներն այս ամիս են լինելու, բայց այլ մանրամասներ հայտնել առայժմ չեմ կարող»,- ասաց նա՝ խոստանալով առաջիկայում ESem.am-ին պատմել նորությունները:)
Ժամանց
«Ժամանցս շատ հետաքրքիր է անցնում. անդադար փորձում եմ ժամանցի նոր տարբերակներ գտնել Երևանում: Ցավոք, մենք այդքան էլ շատ տարբերակներ չունենք: Ես իմ էությամբ շատ ակտիվ մարդ եմ. նույն օրը գուցե ինձ տեսնեն Գառնիում, հետո՝ փաբում: Վերջերս փաբային կյանքը սկսել է կրկին գրավել ինձ: Ես 16 տարեկանում անցա փաբային կյանքի, հետո հոգնեցի, բայց հիմա նորից ակտիվացել եմ և երեկոյան հաճախ եմ լինում փաբերում»,- ասաց Դիանան:
Դերասանուհին նշեց, որ չի կտրվում նաև արվեստից. «Շատ երկնակարկառ չասեմ, բայց թատրոններ, դասական համերգներ, թանգարաններ, պատկերասրահներ անպայման գնում եմ: Ընկերներս հեգնում են, թե միակ բաժանորդն եմ, ով սպասում է Ֆիլհարմոնիկի նամակներին, պահպանում դրանք, ու գնում համերգի:) Շատ եմ սիրում Երիտասարդական նվագախմբին, քանի որ նրանք շատ են փորձարարություններ անում, ընդ որում՝ ստացված, ինչը ես շատ եմ սիրում: Մի խոսքով՝ ցերեկս անցնում է արվեստի, երեկոս՝ ընկերներիս հետ ինտելեկտուալ զրույցների, փաբային կյանքի միջավայրում»:
Դիանան շեշտեց, որ շատ քիչ է լինում տանը, սակայն նման օրերին իրեն նվիրում է ֆիլմեր դիտելուն: «Գրքերի մասին չեմ խոսում, դրանք իրենց առանձին տեղն ունեն»,- նկատեց նա:
Անձնական կյանք
Դիանան նկատեց, որ կարիերային տրված մարդը միշտ խնդիրներ է ունենում անձնական կյանքում: «Կար մարդ, ով շատ հաճախ էր կրկնում, որ ես կարիերիստ եմ… գուցե: Կարիերան շատ կարևոր տեղ է գրավում իմ կյանքում, բայց եթե կլինի այն մեկը, ով կունենա այդքան համարձակոթյուն, կամք, տղամարդկություն և ինձ կկտրի իմ կարիերայից, ուրեմն նա կլինի իմ կյանքում»,- մարտահրավեր նետեց Դիանան:)
Նրա խոսքով՝ շատ խիտ գրաֆիկով է աշխատում, ինչը թույլ չի տալիս անգամ մտածել անձնական կյանքի մասին: «էլ չասեմ հանրության առաջ պատասխանատու ու հաշվետու լինելը՝ մտերիմ ընկերոջ հետ 3 լուսանկար և վերջ. ասում են՝ միասին են»,- ասաց հաղորդավարուհին՝ նշելով, որ շարունակ հնարության ուշադրության կենտրոմնում լինելը խանգարում է: «Դու քեզ չես կարող թույլ տալ այն, ինչ կցանկանայիր, ժամանցդ ինչ-որ մեկի հետ վայելես այնպես, ինչպես կցանկանայիր: Կաղապարված ես լինում, բայց ես փորձում եմ կյանքիս ոչ մի փուլը չկորցնել հանրային մարդ լինելու պատճառով,- ասաց նա և հավելեց,- եղել է մարդ, ում հետ շփումս խաղաղ ու կատարյալ չի ստացվել հենց դրանից ելնելով»: Դերասանուհին չցանկացավ բացահայտել, թե խոսքն ում մասին է, միայն նշեց, որ ևս այս բնագավառից է եղել:
Ինչ վերաբերում է իր և դերասան Սոս Ջանիբեկյանի հավանական սիրավեպի մասին ասեկոսեներին՝ դերասանուհին ասաց. «Սոսը լավ ընկերս է, շատ հետաքրքիր մարդ, ում հետ երբեմն-երբեմն շփվում ենք, որոշ ժամանակ առաջ ավելի հաճախ էինք շփվում, հետո երևի երկուսիս զբաղվածության պատճառով սկսեցինք ավելի քիչ շփվել, բայց կապը կա: Մասնագիտական առումով՝ ֆիլմերում նկարահանվելու հետ կապված, նա շատ է օգնում ինձ, խորհուրդներ է տալիս: Մեր շփումն այդ մակարդակի վրա է, ոչինչ ավելին: Սիրտս ազատ է, ինչպես թռչունը»:
Ներկայացրեց Ամալյա Հովհաննիսյանը
