Դերասանուհի Նառա Դիլանյանը հայտնի է իր վառ կերպարներով, առօրյա հագուստի ու արտաքինի հետ կապված գունային բազմազանությամբ եւ մշտապես ժպտառատ տեսակով: Դերասանուհին չի թաքցնում նաեւ իր անձնական կյանքը, միշտ բաց է ու պատրաստակամ' մարդկանց հետ կիսվել իր անձնական լուսանկարներով:
Հարցազրույցներում Նառան բազմիցս է նշել, որ այն քիչ դերասանուհիներից է, ում գրեթե չեն քննադատում, բայց արի ու տես, որ նա եւս հայտնվեց քննադատությունների կենտրոնում:
«38-ամյա կինը մնացել է 15 տարեկան էմոյի կերպարի տակ: Վարդագույն մազեր, կատվի աչքեր լինզաներ, սև, կաշվե հագուստ և այլ մանկական արդուզարդ, անհասկանալի վարք... Հոգնեցինք արդեն, կարելի է մի քիչ զարգանալ, ոչ միայն տարիքով, այլև մտածելակերպով մեծանալ»,- այսպես են բնորոշել դերասանուհուն, որին ի պատասխան Life.panorama.am-ի հետ զրույցում Նառա Դիլանյանը ժպիտով հակադարձեց.
«Շատ ծիծաղելի է, ես ընդամենը ուրախ եմ, որ իրենց թանկագին ժամանակից նվիրում են ինձ, չէ որ կյանքում ամենաթանկը հենց ժամանակն է: Միշտ ասել եմ, որ շատ քիչ եմ քննադատվում, միաժամանակ, շատ նորմալ եմ վերաբերվում այս ամենին: Քննադատողները պարզապես ասում են իրենց կարծիքը, բայց ես երբեւէ չեմ էլ պատրաստվում մեծանալ ու հենց դրանով էլ բացառիկ երջանիկներից եմ: Շնորհակալ եմ իմ սիրելի երկրպագուներին ու բոլոր նրանց, ովքեր այդքան ջերմ խոսքեր են գրում իմ մասին»:
