Կանանց միամսյակի առթիվ ESem.am-ը զրուցել է նաև հաղորդավարուհի Արևիկ Ուդումյանի հետ: Ըստ նրա` գարնան տոները գնահատված ու սիրված զգալու շատ լավ առիթ է կանանց համար:

Արևիկի խոսքով`Կանանց տոների կապակցությամբ տարբեր նվերներ է ստացել: «Շատ եմ սիրում ոչ միայն նվերներ ստանալ, այլև նվիրել: Այս տարվա ամենայուրօրինակ նվերն ինձ համար այն է, որ սկսեցինք ստեղծել մեր ֆիրմային թևնոցներն ու թեմատիկ կախազարդերը: Կարծում եմ՝ շատ կանանց ու աղջիկների տոնը ավելի ուրախ դարձավ մեր ֆիրմայի նվերը ստանալով»,- նշեց Արևիկը:

Հաշվի առնելով, որ յուրաքանչյուր կնոջ համար լավագույն նվերը կարող է տարբեր լինել՝ ավելացրեց. «Եթե խոսքը նյութական նվերի մասին է, ապա երևի թե ծաղիկները միշտ տեղին են»: Հաղորդավարուհին կարծում է նաև, որ անկախ տոնից՝ լավագույն նվեր կլինի նաև շրջագայելը. «Այն միշտ լավ որոշում է. այս դեպքում կապ չունի նույնիսկ երկրի ընտրությունը»:

Արևիկի համար գարնանային տոները խիտ աշխատանքային են անցնում: «Այս տարի այդպես ստացվեց :) Բայց հատկապես այսպիսի զբաղված գրաֆիկով աշխատանքային օրերին շատ եմ կարևորում, որ կողքիս է իմ սիրած տղամարդը, ով ոչ միայն միամսյակի ընթացքում, այլև առհասարակ՝ անակնկալների միջոցով ու իր վերաբերմունքով ինձ ստիպում է սիրված, գնահատված ու երջանիկ զգալ»,-շեշտեց Արևիկը: