«Արմենպրես» լրատվական գործակալության «Երևանյան բեսթսելեր» հեղինակային նախագծի վարկանիշային աղյուսակն այս շաբաթ միանգամից արտասահմանյան երկու հեղինակի գիրք է գլխավորում: Առաջին և երկրորդ հորիզոնականներում են հայտնվել Պաուլո Կոելյոյի և Ֆրենսիս Սքոթ Ֆիցջերալդի ստեղծագործությունները, որոնք վաճառվել են հավասար քանակով:
Բրազիլացի ժամանակակից գրող Պաուլո Կոելյոյի' համաշխարհային բեսթսելեր դարձած «Ալքիմիկոսը» վեպը շարունակում է հետաքրքրություն վայելել հայ ընթերցողների շրջանում: Այս ստեղծագործությունն աշխարհի 117 երկրում 67 լեզուներով թարգմանված բացառիկ գրքերից է:
Բեսթսելերի ցանկում ընդգրկված հաջորդ գիրքը' ամերիկացի գրող Ֆրենսիս Սքոթ Ֆիցջերալդի «Մեծն Գեթսբին» առաջին անգամ հրատարակվել է 1925 թ-ին և համարվում է ամերիկյան գրականության մեջ «ջազի դարաշրջանին» բնորոշ ստեղծագործություններից մեկը:
Հայաստանի գրողների միության անդամ, «Ոսկե եղեգն» պետական մրցանակի դափնեկիր, երջանկահիշատակ գրող Լևոն Խեչոյանի «Արշակ արքա, Դրաստամատ ներքինի» պատմավեպն այս շաբաթ երրորդ հորիզոնականում է: Այն երեք հրատարակություն է ունեցել: Լևոն Խեչոյանը, չվախենալով ֆինանսական և տեխնիկական սուղ վիճակից, երբ չկար ոչ գումար, ոչ էլ թուղթ, 1995թ. հրատարակեց իր ստեղծագործությունը: Վեպը վերահրատարակվեց 2002-ին, որին հաջորդեց երրորդ հրատարակությունը: Սա խոսում է այն մասին, որ Լևոն Խեչոյանի գրքերը գրախանութներում ամենափնտրվածներից են ու ամենահարցվածներից մեկը' գրադարաններում: «Արշակ արքա, Դրաստամատ ներքինի» պատմավեպի մասին բազմաթիվ հոդվածներ և ուսումնասիրություններ են գրվել: Գիրքը հիմնված է 4-րդ դարի պատմական իրադարձությունների վրա, որոնք Խեչոյանը յուրովի է ներկայացնում ու մեկնաբանում: Գրողը պատմում է նաև նորագույն ժամանակների հայկական անկախ պետականության կայացման դժվարությունների մասին: Այդ առումով վեպը նաև մեր ժամանակների մասին է՝ հասարակական, քաղաքական ու սոցիալական հարցերի առարկայական ճանաչելիությամբ:
Չորրորդ հորիզոնականն է զբաղեցնում ֆրանսիացի արձակագիր ու թատերագիր Ալբեր Քամյուի «Ժանտախտը» վեպը: Այն ներկայացնում է նացիզմի և ֆաշիզմիհակասությունները:
Սրան հաջորդում է կոլումբացի գրող Գաբրիել Գարսիա Մարկեսի «Վերհիշելով իմ տխուր պոռնիկներին» վիպակը: Այն 2010 թ. ռուսերենից թարգմանել է Հովհաննես Այվազյանը: Երկը լայն ճանաչում է գտել Հայաստանում' հաճախակի հայտնվելով բեսթսելերների շարքում:
Ամենաշատ վաճառված գրքերի վեցերորդ հորիզոնականը զբաղեցնում է ֆրանսիացի գրողԱնտուան դը Սենտ Էքզյուպերիի «Փոքրիկ իշխանը»: Գիրքը հրատարակվել է 1943 թ. և համարվում է հեղինակի ամենահայտնի ստեղծագործությունը: Այն տպագրել է «Անտարես» հրատարակչությունը: Ստեղծագործությունը թարգմանվել է ավելի քան 190 լեզուներով և վաճառվել ավելի քան 80 միլիոն տպաքանակով:
Անգլիացի գրող Ջորջ Օրուելի «Անասնաֆերմա» ստեղծագործությունն ընդգրկվել է «Երևանյան բեսթսելերի» ցուցակում:
«Անասնաֆերմա»-ն գրվել է 1944 թվականին և առաջին անգամ լույս է տեսել 1945-ին: Այս պատմվածքը հակաուտոպիական տարրեր է պարունակում: Գիրքն արգելված է Չինաստանում, Հյուսիսային Կորեայում, Բիրմայում և իսլամական աշխարհի մի շարք երկրներում:
Վիլյամ Շեքսպիրի «Համլետը» ևս բեսթսելերների ցանկում է: Այն զբաղեցնում է ութերորդ հորիզոնականը: «Համլետը» համարվում է Շեքսպիրի ամենահաջողված ու նշանավոր ստեղծագործությունը։ Գրվել է 1600-ականներին և առաջին անգամ լույս է տեսել 1603-ին: Այս պիեսի հիման վրա նկարահանվել են բազմաթիվ կինոնկարներ, բեմադրվել բազում ներկայացումներ։
Լևոն Խեչոյանի «Փուշը, հայր, փուշը» պատմվածքների ժողովածուն ևս մեծ պահանջարկ է ունեցել վերջին շաբաթվա ընթացքում: Այս գրքի պատմվածքները ստեղծված են առեղծվածայնության (միստիցիզմ) և իրական կյանքի համատեքստում:
Ջորջ Օրուելի մեկ այլ' «1984» վեպն այս անգամ եզրափակում է բեսթսելերների շարքը: Այն ընդգրկված է «Անտարես» հրատարակչության «Արգելված գրքեր» մատենաշարում: Գիրքը մինչև օրս բազմաթիվ երկրներում արգելվածների ցանկում է: Առաջին հրատարակությունից 64 տարի անց «1984»-ը վերջապես լույս է տեսել նաև հայերեն՝ Աստղիկ Աթաբեկյանի'բնագրից կատարած թարգմանությամբ:
Վարկանիշային ցուցակի կազմման հարցումներին մասնակցել են «Նոր գիրք» (093-60-40-64), «Նոյյան տապան» (56-81-84), «Հայ գիրք» (54-07-06), «Բյուրոկրատ» (50-01-52), «Բուկինիստ» (53-74-13), «Արտ Բրիջ» (58-12-84) և «Զանգակ» (23-25-28) գրախանութները: Հարցման ընթացքում հաշվի չեն առնվել մասնագիտական, տեղեկատվական բնույթի գրքերն ու դասագրքերը:
