Բարձր կրունկներ հագնելիս կոնքն առաջ է գալիս, որի պատճառով մեջքն ավելի է կորանում՝ հանգեցնելով ողերի խախտման:
"Սուրսայր" բարձր կրունկներ
Այս կրունկով կոշիկը բոլորովին հոաալի չէ, նույնիսկ եթե կոշիկի կաղապարն անթերի է, կրնկամասը ամուր է, և առաջին հայացքից կոշիկը վստահություն է ներշնչում: Սակայն այս կարգի կոշիկների վրա մարմնի կշիռն անհավասարաչափ է բաշխվում, ինչի հետևանքով էլ, բացի "ուղղակի բարձր կրունկների" առաջացրած խնդիրներից, լինում են նաև այլ կարգի
անցանկալի հետևանքներ՝ կոշտուկներ, ոտքերի այտուցվածություն:
Բարձր պլատֆորմ
Ոտնաթաթի աշխատանքի արդյունքում (շարժումը կրունկից տեղափոխվում է դեպի ոտնաթաթ) կարգավորվում է մի շարք ներքին օրգանների աշխատանքը՝ սիրտ, երիկամներ, լյարդ: Պլատֆորմով կոշիկներ հագնելիս ոտնաթաթը "պարապության է մատնվում", և փաստորեն ներքին օրգանները զրկվում են իրենց աշխատանքը խթանող արտաքին ազդակից:
Դրա հետ մեկտեղ, ոտնաթաթի կամարը պահող մկաններն ու ջլերը նույնպես զրկվում են կծկվելու-թուլանալու հնարավորությունից, վատանում է արյան շրջանառությունը, իսկ դա բավականին հիմնավոր պատճառ է ժամանակի ընթացքում արթրոզի զարգացման համար:
Սուրքիթ
Հաճախակի սուր քթով կոշիկներ հագնելու հետևանքով թե' տղամարդկանց և թե' կանանց մոտ կարող է լայնակի հարթաթաթություն զարգանալ: Եվ ոչ միայն:
Մատների վրա ի հայտ են գալիս տգեղ, հիվանդագին կոշտուկներ, որոնք հնարավոր է հեռացնել միմիայն վիրահատական միջամտությամբ:
Տափակ կրունկներ
Տափակ կրունկներով կոշիկները զրկված են վերհակող, զսպակավոր ֆունկցիաներից, ինչը նույնպես կարող է ժամանակի ընթացքում հարթաթաթություն առաջացնել:
Ի դեպ
Առողջության համար անվնաս, օրինակելի կոշիկը պետք է ունենա հետնյալ հատկանիշները՝
- կրունկը պետք է լինի կայուն, 4 սմ-ից ոչ բարձր:
- Քիթը պետք է լինի կլորավուն կամ ուղղանկյունաձև, որպեսզի ոտքի բոլոր մատները ազատ և հանգիստ լինեն:
- Կրնկամասը պետք է չափավոր ամուր լինի, որպեսզի չհարի ու չսեղմի կոճերը, ինչպես նաև՝ չճնշի կրունկը:
