Ճանաչված հայ դերասան, ՀՀ վաստակավոր արտիստ Հրանտ Թոխատյանը նկարահանվել է ռուսական CTC հեռուստաալիքի «Վերջին Մահիկյանը» նոր սերիալում:

Կոմեդիան պատմում է 45-ամյա Կարեն Մահիկյանի մասին: Հրանտի կերպարն իրեն շատ ժամանակակից է համարում, բայց նրան նյարդայնացնում է, որ շրջապատում բոլորը տարված են iPad-ով եւ iPhone-ով: Ֆիլմի սյուժեի հիմքում հայ ավանդապաշտ տղամարդու երազանքն է, ով երազում է տղա ունենալ, սակայն մինչ նա երազում է դրա մասին, դուստրերը մեծանում են, ու ամեն մեկը սկսում է փնտրել իր կեսին, որոնցից ոչ մեկին Մահիկյանը այդպես էլ չի հավանում:

Նա չի հասկանում ժամանակակից հարաբերությունները: Ինչպե՞ս կարող է դստեր ընկերը մնալ իրենց տանը գիշերելու, եթե նրանք ամուսնացած չեն: Եվ նրան չի հետաքրքրում կնոջ հավաստիացումները, որ «հիմա բոլորն այդպես են անում»: Թող բոլորն այդպես անեն, բայց ո՛չ իր ընտանիքում: Նա կովկասցի է, իր սկզբունքներն ունի:

Սերիալը հեռարձակվելու է սեպտեմբերից: Հեռուստասերիալի ռեժիսորը Ռեզո Գիգինեիշվիլին է: