Փարիզում այսօր բացվում է աշխարհի ամենահայտնի օծանելիքին՝ Chanel №5-ին նվիրված ցուցահանդեսը, հայտնում է ИТАР-ТАСС գործակալությունը։

Նախկինում երբեք նման խոշոր ցուցադրություն նվիրված չի եղել օծանելիքին՝ միաժամանակ որպես նյութական իրի, արվեստի գործի և ժամանակակից քաղաքակրթության ֆենոմենի։

Մոսկվայում ծնված լեգենդար պարֆյումեր Էռնեստ Բոյի կողմից և Կոկո Շանելի անմիջական մասնակցությամբ ստեղծված այս օծանելիքը ժամանակակից աշխարհում ստացել է գրեթե առասպելական կարգավիճակ։ Ներկայիս ցուցադրությունը թույլ է տալիս ծանոթանալ օծանելիքի ստեղծման պատմությանը։

Ցուցադրությունը տալիս է նաև ավանդական հարցի պատասխանը՝ ինչո՞ւ է անվան մեջ նշվում 5 թիվը։

«Այս օծանելիքը լռության արվեստ է։ Ինչպես պոեզիան և երաժշտությունը, այն իր մեջ գաղտնիքների փունջ է պարունակում»,- ասել է ցուցադրության կազմակերպիչ Ժան Լուի Ֆրոման։

Յուրահատուկ տեղ է հատկացված Chanel №5-ի հայտնի շշի ստեղծման պատմությանը։

Ցուցահանդեսն անցկացվում է Palais de Tokyo փարիզյան հայտնի ժամանակակից արվեստների կենտրոնում և կտևի մինչև հունիսի 5-ը։