Որքան մեծ է կնոջ տարիքը, այնքան թեթև պետք է լինի դիմահարդարումը

23:01 - 1.Օգոստոս.2013

Ակնաբույժները զգուշացնում են' դիմահարդարման նյութերի մեծ քանակության, փայլերի օգտագործման դեպքում փոքր մասնիկները կարող են ընկնել կոնյուկտիվալ տարածություն և առաջացնել կոնյուկտիվիտ կոչվող բորբոքային հիվանդությունը: Հետաքրքիր է նաև այն, որ դիմահարդարման միջոցով աչքերի ընդգծումը, նրանց չափերի տեսողական մեծացումը երիտասարդացնում է կնոջը:

Հնարավոր է' հիմքում երեխաների' մեծ աչքեր ունենալու փաստն է. աչքերն ի սկզբանե ունենում են իրենց ամբողջական չափն ու կյանքի ընթացքում, համեմատած մարմնի այլ մասերի հետ, շատ քիչ են մեծանում: Այս առումով սխալ է աչքերի սև շրջագծումը: Այն տեսողականորեն փոքրացնում է աչքերը, և կինն իր տարիքից մեծ է երևում: Ստորին կոպի շրջագծումը ''իջեցնում'' է կոպերն ու ''ծանրացնում'' աչքերը:

35-40 տ.-ից հետո կտրականապես պետք է հրաժարվել մուգ ստվերաներկի և սև մատիտի օգտագործումից ստորին կոպի շրջանում: Մուգ ստվերաներկ աչքերի միջային անկյունում' սրանից պետք է խուսափել հատկապես իրար մոտ տեղակայված աչքերի պարագայում:

Իսկ օրինակ հոնքերի մուգ ներկումն ու արտաքին եզրի իջեցումը ծերացնում է դեմքը: Տարիքի հետ դիմահարդարումը պետք է նուրբ ու թեթև դառնա, սակայն դիմահարդարումից առհասարակ հրաժարվելը նույնպես ճիշտ չէ: Նախընտրելի է օգտագործել բաց երանգներ:

Կնճիռները դիմահարդարմամբ ծածկելու համար անհրաժեշտ է կնճռոտ հատվածին հաղորդել ավելի բաց երանգ, քան մնացյալ մաշկին: Այս դեպքում դիտողի աչքն այդ հատվածները կընկալի որպես հարթ մակերես: Հիշենք նաև, որ բոլոր գծերը պետք է ուղղված լինեն դեպի վեր (վերին կոպ, հոնքեր):

Աղբյուր՝

http://www.doctors.am/am/announcments/%D5%88%D6%80%D6%84%D5%A1%D5%B6-%D5%B4%D5%A5%D5%AE-%D5%A7-%D5%AF%D5%B6%D5%B8%D5%BB-%D5%BF%D5%A1%D6%80%D5%AB%D6%84%D5%A8-%D5%A1%D5%B5%D5%B6%D6%84%D5%A1%D5%B6-%D5%A9%D5%A5%D5%A9%D6%87-%D5%BA%D5%A5%D5%BF%D6%84-%D5%A7-%D5%AC%D5%AB%D5%B6%D5%AB-%D5%A4%D5%AB%D5%B4%D5%A1%D5%B0%D5%A1%D6%80%D5%A4%D5%A1%D6%80%D5%B8%D6%82%D5%B4%D5%A8/6540?page=1