Քնելուց առաջ ուտե՞լ, թե՞ ոչ: Այս հարցի շուրջ քննարկումները երկար պատմություն ունեն: Ակնհայտ է, որ եթե դուք պայքարում եք ավելորդ քաշի դեմ, ապա պետք է ընթրեք հնարավորինս շուտ. ավելորդ է ասել, որ ընթրիքը պետք է ունենա ցածր կալորիականություն:
Մասնագետներն այս հարցին մոտեցան մյուս կողմից` նրանք գնահատեցին, թե որ սնունդն է օգնում արագ քնել, իսկ որ մթերքներն են բացասաբար ազդում քնի տևողության վրա:
Որոշ մթերքներ պարունակում են նյութեր, որոնք օգնում են արագ քնել` բալ, բանան, կաթ, վարսակի փաթիլներ, մյուսլի, խոտաբույսերով թեյ:
Գիտնականները նաև ճշտեցին այն մթերքների ցուցակը, որոնք կրճատում են քնի տևողությունը և վատացնում քնի որակը: Դրանք են` համբուրգերները, սուրճը, սև շոկոլադը, էներգետիկ ըմպելիքները, կծու սնունդը, համեմունքները, տապակած սնունդը, ալկոհոլային ըմպելիքները և այլն:
Առաջին հայացքից, ալկոհոլն օգնում է հանգստանալ և քնել: Սակայն, ինչպես ցույց տվեցին ուսումնասիրությունները, ալկոհոլի քիչ քանակով օգտագործումը ոչ միայն կրճատում է քնի տևողությունը, այլև բացասաբար է անդրադառնում քնի որակի վրա:
Ուստի, գիտնականները խորհուրդ են տալիս քնելուց առաջ հրաժարվել կծու, յուղալի սնունդից, ինչպես նաև կոֆեին և ալկոհոլ պարունակող ըմպելիքները փոխարինել մրգերով, կաթով և թեյով:
