Life.Panorama.am-ի այսօրվա զրուցակիցը երգչուհի Լիլուն է, ով լինելով անմիջական ու շփվող անձնավորություն՝ միշտ մնում է բամբասանքների ու խոսակցությունների ԷՊԻԿԵՆՏՐՈՆՈՒՄ… Բայց նա արդեն սովորել է այդ վիճակին և փորձում է կյանքին նայել այլ տեսանկյունից…
Ի՞նչ հայացքներ են փոխվել նրա մեջ, ինչի՞ է պատրաստ հանուն սիրած տղամարդու և արդյոք կա՞ այդ տղամարդն այժմ նրա կյանքում, կբացահայտի հենց ինքը:
-Այժմ ինչո՞վ եք զբաղված:
-Աշխատում եմ նոր երգերի վրա, նոր տեսահոլովակ պետք է նկարահանեմ: Կոչվում է «Մի րոպե հետո»… Շուտով կհանձնեմ հեռուստադիտողի ուշադրությանը: Նաև պատրաստվում եմ մեկնել Եվրոպա՝ հյուրախաղերի…
-Երգը սիրո՞ մասին է:
-Ոչ, սիրային երգ չի, բայց թող անակնկալ մնա:
-Իսկ նկարահանումները «Երե 1»-ում շարունակվո՞ւմ են:
-Այո, իհարկե: Հիմա եթերաշրջանը ավարտվել է, նորը կսկսվի հավանաբար մարտ-ապրիլ ամիսներին:
-Հեռուստատեսային այլ առաջարկներ չունե՞ք: Օրինակ՝ աշխատել հաղորդավար, դա այսօր արդիական է չէ՞:
-Ոչ-ոչ, ես չեմ ուզում նման բաներով զբաղվել: Կարծում եմ՝ ամեն մարդ իր գործով պետք է զբաղվի…
-Բայց «Երե 1»-ում հանդես գալը նույնպես ձեր մասնագիտության հետ կապ չունի…
-Այնքան էլ տարբեր չի իմ մասնագիտությունից… Բեմի վրա բոլորն էլ արտիստ են, խաղում են, «աշխատում» հանդիսատեսի հետ՝ լինի երգիչ, թե դերասան…
-Լիլու, բնավորությամբ հանդա՞րտ եք, թե՞…
-Այնքան ժամանակ եմ հանդարտ, մինչև ինձ հունից չեն հանում…
-Բայց ասում են՝ շատ շուտ եք բորբոքվում:
-Չէ, շուտ չեմ բորբոքվում: Թեև խառնվածքով մի քիչ անհանգիստ եմ, բայց արդեն որքան ժամանակ է՝ ինձ սովորեցրել եմ, որ այդպես չպետք է լինի: Ինձ վրա աշխատելով՝ որոշել եմ շուտ չբռնկվել, չնյարդայնանալ, քանի որ դա վնաս է իմ առողջությանը…
-Ձեզ ի՞նչը կարող է հունից հանել:
-Սուտը, երբ նայեն աչքերիս մեջ ու սուտ խոսեն…
-Կարո՞ղ եք հիշել՝ վերջին անգամ նման իրավիճակում երբ եք հայտնվել:
-… Փառք Աստծո, վերջերս նման դեպք չի գրանցվել… Գիտեք, եթե ինձ շատ մտերիմ մարդ է խաբում, միգուցե շատ ծանր տանեմ: Բայց եթե այդ մարդն ինձ համար միևնույնն է, կարող եմ աչք փակել այդ ստի վրա, անտեսել…
-Բայց դուք այնպիսի մասնագիտություն եք ընտրել, որ ուզեք-չուզեք, պարբերաբար ստի հետ առնչվելու եք՝ բամբասանքներ, ասեկոսեներ… Խոսակցություններ, որոնք ոչ միշտ են իրականությանը համապատասխանում…
-Այդ բամբասանքներին ես վաղուց ականջ չեմ դնում, ինձ համար միևնուն է… Եթե մի երևույթի անուն բամբասանք է, լուրջ չեմ վերաբերում: Կայացած մարդիկ երբեք չեն բամբասի… Անձամբ ես չեմ բամբասում, չեմ էլ սիրում բամբասողներին…
-Բայց բոլորովին չանդրադառնալ դրանց՝ չեք կարող չէ՞: Ի վերջո, եթե լռեք, մարդիկ կհավատան խոսակցություններին:
-Գիտե՞ք, ինչքան էլ պատասխանես կամ բացատրես, խոսակցությունները շարունակվելու են: Մարդկանց մի տեսակ կա, որ դա իր կյանքի զբաղմունք, մաս է համարում: Որքան էլ հերքեմ՝ միևնույն է, բամբասողը կբամբասի, ոչնչ չես կարող անել…
-Փորձենք մեկ-երկու խոսակցությունների հենց հիմա վերջ դնել, կամ, գուցե, հաստատել, չգիտեմ… Օրինակ, հաճախ են խոսում, որ դուք բազմաթիվ վիրահատություններ եք տարել…
-Բազմաթի՞վ… Չի համապատասխանում իրականությանը: Վիրահատություններ եղել են, բայց ոչ բազմաթիվ…
-Իսկ այն, որ շքեղ առանձնատուն եք նվեր ստացել ձեր հարուստ երկրպագուից, ավելի ճիշտ՝ սիրեկանից…
-Ոչ հիմնավոր ու սուտ խոսակցություններ են, նման բան չկա:
-Իսկ մարդիկ ինչո՞ւ են սիրում այդ մասին խոսել, որտեղի՞ց են հորինում:
-Ուղղակի պատկերացնում են, որ լինելով միայնակ երգչուհի, նկատելի կին՝ հնարավոր է, որ ունենամ հարուստ սիրեկան, որն էլ ինձ կնվիրի առանձնատուն…Ես այդպիսի բաների վրա բարձր ծիծաղել կարող եմ միայն…
-Լիլու, ինչպես ինքներդ նշեցիք, միայնակ եք ապրում, ու, բնականաբար, ձեր և հաջողությունների, և անհաջողությունների միակ մեղավորը դուք եք… Բայց կարողացել եք ունենալ ձեռքբերումներ… Ձեզ ուժեղ կին համարո՞ւմ եք:
-… Ուժեղ մարդ եմ համարում… Իհարկե այն, որ արդեն ունեմ ձեռքբերումներ, վկայում է իմ ուժեղության մասին…
-Ֆինանսական առումով չե՞ք դժվարանում: Հայաստանում միայնակ երգչուհուն դժվար չէ՞: ինքնե՞րդ եք ձեզ հովանավորում:
-Իհարկե դժվար է, բայց ես աշխատում եմ, ինձ օգնում է նաև ծնողս…
-Փաստորեն ծնողից ֆինանսապես կախվածություն մնում է…
-Ոչ, կախվածություն չունեմ իհարկե: Պարզապես նորմալ է, որ ծնողը միշտ իր զավակի կողքին է՝ անկախ տարիքից… Դա շատ լավ զգացողություն է… Քանի որ ծնողս ինձանից հեռու է, բնականաբար ուզում է իր զավակին աջակցած լինի՝ հաշվի առնելով, որ միայնակ ապրող աղջիկ եմ և ունեմ բազմաթիվ հոգսեր… Այնպես որ նորմալ է, որ ինձ օգնում ու հոգ է տանում իմ մասին…
Շարունակությունը՝ այստեղ:
