PanARMENIAN.Net - Մեկնարկել են Արամ Խաչատրյանի անվան 9-րդ միջազգային մրցույթը և Արամ Խաչատրյան փառատոնը: Մոսկվայի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Պավել Կոգանը նկատել է, որ Արամ Խաչատրյանի անվան միջազգային մրցույթը մեծ հնարավորություն է երիտասարդների համար։ Նա իր ընտանեկան արխիվից թանկարժեք նվեր էր պատրաստել Արամ Խաչատրյանի թանգարանին՝ ուղիղ 60 տարի առաջ 1953 թվականի հունիսի 6-ին Արամ Խաչատրյանի ձեռքով գրված նամակը։
Կոմպոզիտորի որդի Կարեն Խաչատրյանն էլ հավելել է, որ իր համար Երևան այցելությունը միշտ շատ հուզիչ է, քանի որ Հայաստանում ամեն ինչ շնչում է Արամ Խաչատրյանով:
«Ես զգացմունքային լիցքեր եմ ստանում Հայաստանում։ Միաժամանակ ինձ մոտ հուշեր են արթնանում. բազմաթիվ անգամներ եմ Արամ Խաչատրյանի հետ եղել Հայաստանում, այս դահլիճում։ Ես ուզում եմ իմ երախտագիտությունն ու խոնարհումը հայտնել հայ ժողովրդին Արամ Խաչատրյանի նկատմամբ ունեցած մեծ սիրո ու հարգանքի համար»,- ասել է նա:
Մրցույթի առաջին փուլը կտևի մինչև հունիսի 9-ը, երկրորդը՝ հունիսի 10-11-ը, երրորդ փուլը՝ հունիսի 13-ին, իսկ հունիսի 14-ին տեղի կունենա գալա համերգն ու պարգևատրման արարողությունը։