Սիլվանա Արշակյանի' Սիլվիի տեսահոլովակները հայկական եթերում վերջին անգամ ցուցադրվել են հինգ տարի առաջ: Թե դրանից հետո ինչ փոփոխություններ են եղել նրա ստեղծագործական եւ անձնական կյանքում, երգչուհին պատմել է BRAVO.am-ին: Հրապարակման վերջում ներկայացված են Սիլվիի երկու տեսահոլովակները, որոնցից մեկը թողարկվել է նախորդ տարի:

Բնակվում եմ Երեւանում, բայց վերջին տարիներին հաճախ եմ բացակայում Հայաստանից' շրջագայելով Եվրոպայում եւ Ռուսաստանում:

Ինձ շոու-բիզնեսի ներկայացուցիչ չեմ համարում. չեմ մասնակցում շոուբիզնեսյան եռուզեռին եւ ցանկություն էլ չունեմ մրցակցել:

“All Would Envy” տեսահոլովակից հետո շուրջ 5 տարի է' եթերում չեմ: Չեմ մասնակցում հեռուստատեսային նախագծերի, ավելին' նոր տեսահոլովակներս էլ չեն հեռարձակվում: Իսկ հիմնական պատճառն այն է, որ չեմ պատրաստվում վճարել, որպեսզի իմ տեսահոլովակները ցուցադրվեն:

Շատերը կարծում են, թե այլեւս չեմ ստեղծագործում, բայց այդպես չէ: Նաեւ նոր տեսահոլովակ ունեմ, որը նկարահանվել է նախորդ տարի' “Temptation” երգի հիման վրա: Վերոնշյալ պատճառով այն եթերում չցուցադրվեց:

Նորմալ եմ վերաբերվում երգիչների' ակումբներում երգելուն: Ժամանակին ես էլ եմ երգել: Դա 2001 թվականին էր, իսկ հիմա ակումբներում չեմ երգում:

Հայկական շոու-բիզնեսի ներկայացուցիչներից շատերի հետ շփվում եմ, լավ հարաբերությունների մեջ ենք:

Տեղի երաժշտական բնագավառում դրական որոշ կետեր տեսնում եմ. շատ ողջունելի է, որ մեր երիտասարդությունը սկսել է լսել եւ գնահատել ջազը: Իսկ բացասականն այնքան ակնհայտ է, որ նույնիսկ չեմ ուզում դրա մասին խոսել:

Սեփական բիզնես ունեմ' խանութների ցանց, որի շնորհիվ էլ հոգում եմ ծախսերս:

Մերժել եմ սերիալներում նկարահանվելու առաջարկները: Այնքան էլ հետաքրքրված չեմ դրանցով:

Երկրպագուներիցս' կրկին բեմ վերադառնալու հորդորներով շատ նամակներ եմ ստանում: Կարծում եմ' ժամանակները կփոխվեն… Չի բացառվում, որ մի օր կրկին համերգներով հանդես կգամ:

Ամուսնացած չեմ, երեխա չունեմ: Սիրտս ազատ է: