«Սիրո գերին» սերիալում Էլենին մարմնավորող Շուշան Երիցյանը որոշել է դերասանական կրթություն ստանալ ու իր կարիերան շարունակել ոչ միայն որպես մոդել, այլև դերասանուհի: ESem.am-ի հետ զրույցում Շուշանը նշեց, որ այժմ որպես հյուր հաճախ է լինում Թատերական ինստիտուտում: «Մասնակցում եմ այնտեղ արվող փորձերին, ծանոթանում եմ միջավայրին»,-ասաց նա և հույս հայտնեց, որ սեպտեմբերին կընդունվի Թատերականի դերասանական բաժինն ու դարձյալ ուսանող կլինի:
«Կարծում եմ, մեծ բարդություն չի լինի, քանի որ արդեն ունեմ բարձրագույն կրթություն և փորձ` դերասանական ոլորտում»,- նկատեց սերիալային դերասանուհին:
Ըստ Շուշանի` երբ ընդունվի Թատերական, այլևս իրեն չեն քննադատի: «Ցանկանում եմ խորանալ այդ մասնագիտության մեջ ու պրոֆեսիոնալ դառնալ: Կարծում եմ` այդ դեպքում այլևս քննադատություն չեմ լսի, որ մոդել- դիվանագետը խաղում է սերիալում կամ ֆիլմում: Այլևս նյութ չի մնա քննադատելու, բացի անձնականս, իհարկե»,- կարծում է Էլենի դերակատար մոդելը: Վերջինիս խոսքով` թե կինոն, թե թատրոնն իր երջանկության մի մասն են, ու առանց դրանց չի պատկերացնում իր կյանքը:
Մեզ հետ զրույցում Շուշանը նկատեց, որ ապագայում էլ կշարունակի որպես դերասանուհի հանդես գալ, եթե, իհարկե, իր սիրած մարդը դեմ չլինի: «Չեմ կարծում, որ իմ սիրած մարդը այնպես անի, որ կտրվեմ իմ աշխարհից»,-ավելացրեց նա:
Ներկայացրեց Արևիկ Իսաջանյանը
