Սուրբ  Սարգսի տոնը Հայաստանում սովորաբար նշվում է ոչ միայն եկեղեցական ծեսով, այլև ժողովրդական սովորույթով. տոնի նախորդ  օրը երիտասարդներն աղի բլիթ են ուտում՝ հուսով, որ երազում կտեսնեն իրենց երկրորդ կեսին:  Ոմանք հավատում և հետևում են այս սովորույթին, ոմանք՝ ոչ: 

Դերասանուհի Անաիս Սարդարյանը ESem.am-ի hետ զրույցում ասաց, որ երբեք չի հետաքրքրվել այս ավանդույթով: «Ինձ համար դա սնահատություն է: Ես նույնիսկ հարսանիքներից հետո կոնֆետ չեմ դնում բարձիս տակ, տարոսիկներ չեմ վերցնում: Կարծում եմ՝ Աստված ինչպես որոշի, այդպես էլ լինելու է: Նրանից առաջ ընկնելը սխալ է: Ուղղակի մենք մեզ համար ինչ-որ բաներ ենք ստեղծում, փորձում հավատալ դրանց»,- ասաց դերասանուհին:

Այնուամենայնիվ, Անաիսը մտաբերեց, որ 17 տարեկանում կերել է աղի բլիթ:) «Ընկերուհիներով որոշեցինք ուտել: Շատ լուրջ վերաբերեցինք այդ ամենին, մի հարևանուհի ունեինք, այրի կին էր, նա  պատրաստեց… Ես ամբողջը չէի կերել որովհետև անհնար էր»,- ասաց նա՝ նշելով, որ գիշերը  ջուր չի խմել: Դերասանուհու երազը «սփոփիչ» չի  եղել:) «Երազումս դելֆին տեսա:) Երևի դեռ չեմ հանդիպել իմ միակին, դրա համար էլ չեմ հավատում նման բաների»,- նկատեց Անաիսը:

Դերասանուհու խոսքով՝ երևույթն իր համար ոչ թե հետաքրքիր է, այլ տանջալի. «Շատ ընկերուհիներ ունեմ, ովքեր աղի բլիթ են ուտում, հետո չեն դիմանում, ջուր են խմում: Ես չեմ հասկանում դրա իմաստը»:

Սուրբ Սարգիս VS Վալենտին հարցին Անաիսը պատասխանեց, որ կողմ  է նշել Սուրբ Սարգիսը, քանի որ այն հայկական տոն է, սակայն ասաց նաև, որ վերջին տարիների զբաղվածության պատճառով չի նշում տոնը:

Դերսանուհին մեզնից տեղեկացավ, որ վաղը Սուրբ Սարգսի տոնն է: «Քանի որ սիրահարված չեմ, չեմ կարող ասել, թե ինչպես կնշեմ տոնը: Միայնակ անհետաքրքիր կլինի, այնպես որ, կնշեմ այն ժամանակ, երբ սիրահարված կլինեմ»,- եզրափակեց դերասանուհին: