Գաբրիել Սունդուկյանի անվան ազգային ակադեմիական թատրոնում հուլիսի 10-ին տեղի է ունեցել ՀՀ սփյուռքի նախարարության` «Իմ Հայաստան» համահայկական երկրորդ փառատոնի «Պարարվեստի օրեր»-ի փակման հանդիսավոր արարողությունը: Միջոցառմանը ելույթներով է հանդես եկել փառատոնի մասնակից պարախմբերը: Փառատոնի մասնակիցներին իր կատարումով ողջունել է լիբանանահայ օպերային երգիչ Գևորգ Հաճյանը:
Նախարարի տեղակալ Սերժ Սրապիոնյանը ողջունել է պարախմբերի մասնակցությունը համահայկական այս փառատոնին, բարձր է գնահատել արվեստի միջոցով հայի տեսակն ու ոգին, ազգային մշակույթը պահպանելու ջանքերը և նշել. «Եթե ոչ վաղ անցյալում Մայր հայրենիքն էր արվեստագետների ու արվեստասեր իր զավակների միջոցով Սփյուռքի հայ համայնքներում փորձում կենսունակ ու հարատև պահել հայ ոգին ու նկարագիրը, ապա այսօր արդեն ինչ-որ չափով փոխվել են դերերը, և Սփյուռքի մեր նվիրյալները իրենց նկարագրի և ինքնության հայկական որակներն են բերել՝ հավելելու մերին՝ հայրենականին: Եվ հաջողում են»:
Նախարարի տեղակալը շնորհակալություն է հայտնել փառատոնի գլխավոր հովանավոր «Օրանժ Արմենիա» ընկերությանը, հովանավոր «Տաշիր Գրուպ» ընկերությանը և լրատվական հովանավորներ Հանրային հեռուստաընկերությանը, «Շանթ», «Երկիր Մեդիա» հեռուստաընկերություններին, Հանրային ռադիոյին՝ փառատոնի կայացմանն աջակցելու համար:
Այնուհետև նախարարի տեղակալը պարախմբերի գեղարվեստական ղեկավարներին է հանձնել «Իմ Հայաստան» համահայկական 2-րդ փառատոնի մասնակցության հավաստագրեր և «Արարատից Եվրոպա», «Վարդուհի Վարդերեսյան» տեսասկավառակներ:
«Իմ Հայաստան» փառատոնի շրջանակներում կանցկացվեն նաև խմբերգային արվեստի օրեր (օգոստոսի 1-ից 6-ը), ասմունքի օր (օգոստոսի 16), դուդուկի փառատոն (սեպտեմբերի 20-ից 24-ը), հայ երգի օր (սեպտեմբերի 26):
«Իմ Հայաստան» համահայկական երկրորդ փառատոնն այս տարի «Պարարվեստի օրեր»-ով մեկնարկել է հուլիսի 1-ին, որի շրջանակներում աշխարհի 12 երկրից ժամանած 35 հայկական պարախմբեր ելույթներով են հանդես
եկել Երևանում, Լոռու, Շիրակի,Արագածոտնի, Արմավիրի, Սյունիքի, Վայոց Ձորի, Կոտայքի, Արարատի մարզերում և Արցախում:
Պարախմբերը ազգային,ժողովրդական հայրենասիրական կատարումներով հանդես են եկել ՀՀ տարբեր քաղաքաների և Արցախի լեփ-լեցուն դահլիճներում`արժանանալով ջերմ ընդունելության: Համերգային շրջագայության
ընթացքում Սփյուռքից ժամանած հայկական պարախմբերը այցելեն նաև Օշականի «Մեսրոպ Մաշտոց» եկեղեցի,
Հառիճավանք, Մայր Աթոռ Սուրբ Էջմիածին, Նորավանք, Սբ. Հովհաննես եկեղեցի,Խոր Վիրապ, Շուշիի եկեղեցի,
ինչպես նաև Սպիտակում այցելեցին երկրաշարժի զոհերի հուշահամալիր:
