Թեև ֆիլմի անվանումը բոլորիս  հիշեցնում է «Հարսնացուն հյուսիսից»  հայտնի կինոնկարը, սակայն սրանք որևէ կերպ փոխկապակցված չեն, պատմություններն էլ տրամագծորեն տարբեր են:

«Հարսնացուն Վեգասից» ֆիլմը նկարահանվել է ԱՄՆ-ում (հայկական գյուղի տեսարանները ևս այնտեղ են նկարահանվել): Թեև աշխատանքներն արվել են ԱՄՆ-ում, անձնակազմը որոշել է առաջին ցուցադրությունը կազմակերպել Հայաստանում: «Մենք եկանք Հայաստան, քանի որ ֆիլմը Հայաստանից է սկսվում: Ցանկացանք գալ մեր տուն և մեր երկրում անել պրեմիերան»,- ESem.am-ին ասաց ֆիլմի պրոդյուսեր Էդմոնդ Գրիգորյանը:

«Հարսնացուն Վեգասից» կինոնկարում խաղացել են Լևոն Շարաֆյանը, Ալլա Թումանյանը, Միքայել Շարաֆյանը, Շարլին Ռոզը, և այլք: Ռեժիսորը Արթուր Բաբայանն է, պրոդյուսերը՝ Էդմոնդ Գրիգորյանը: Սցենարի հիմքում գյուղացի Մկոյի պատմությունն է, ով որոշում է վաճառել ընկերոջը՝ Մարջան անունով կովին, ու գնալ ԱՄՆ՝ գտնելու մի կնոջ, ում միայն լուսանկարն է տեսել: Սակայն անհավանական արկածները Մկոյին բոլորովին այլ ճանապարհով են տանում՝ չփոխելով ամուսնանալու նպատակը: Հարսնացուն Վեգասից հայտնվում է Հայաստանում, թեև դա այն հարսնացուն չէր, ում հետևից գնացել էր գյուղացի տղան:)

Պրեմիերային ներկա լինելու համար Հայաստան էր եկել նաև գլխավոր դերակատարը՝ Միքայել Շարաֆյանը՝ հայտնի դերասան Լևոն Շարաֆյանի որդին:  «Առաջին անգամ էի դիտում ֆիլմը, տեսա այն տեսարանները, որտեղ խաղում եմ հորս հետ: Դա ինձ համար շատ հուզիչ և կարևոր էր»,- ESem.am-ին ասաց Միքայելը, ով մասնագիտությամվ զգեստների ձևավորող է: Նա խոստովանեց, որ ի սկզբանե չէր ցանկանում նկարահանվել ֆիլմում: «Որպես զգեստների ձևավորող՝ ես աշխատել էի Արթուրի հետ: Ինքն ինձ տեսավ այդ կերպարում և  մոտ երեք ամիս փորձում էր ինձ համոզել, որ նկարահանվեմ: Ես կատեգորիկ դեմ էի, քանի որ  մասնագիտությամբ դերասան չեմ, սակայն ծնողներս էլ ինձ համոզեցին ու համաձայնեցի:  Ճիշտն ասած զարմացած էի ինձ վրա. չէի պատկերացնում, որ կարող էի այդքան բացվել կամերայի առաջ: Հիմա սպասում  եմ հանդիսատեսի արձագանքներին»,- նշեց Միքայելը:

Պրոդյուսերի փոխանցմամբ՝ ֆիլմը կցուցադրվի նաև արտերկրում՝ Լոս Անջելեսում, Նյու Յորքում, Կանադայում, Ֆրանսիայում, Ռուսաստանում:

Լուսանկարները՝ Տաթևիկ Մկրտչյանի