Եթե ցանկանում եք երկար ապրել, ապա շուն պահեք:
«Մեր վերլուծությունը ցույց է տվել, որ շան առկայությունը իսկապես պաշտպանում է ցանկացած պատճառով մահից»,- ասում է էնդրոկրինոլոգ Քերոլայն Քրամերը՝ գլոբալ հետազոտությունների նոր սիստեմատիկ վերլուծության առաջատար հեղինակը, հաղորդում է CNN-ը:
Վերլուծվել են հետազոտությունները, որոնց մասնակցել է ԱՄՆ-ում, Կանադայում, Սկանդինավիայում, Նոր Զելանդիայում, Ավստրալիայում և Մեծ Բրիտանիայում մոտ 4 մլն մարդ: «Նրանց շրջանում, որոնք շուն են պահել, մահացությունը նվազել է 24%-ով»,- ասել է Քրամերը:
Վերլուծությունը նաև ցույց է տվել, որ շներն օգնում են մարդկանց վերապրել սրտի կաթվածը կամ ինսուլտը:
Առողջապահության համաշխարհային կազմակերպության տվյալների համաձայն՝ սրտի կաթվածն ու ինսուլտն աշխարհում մահվան հիմնական պատճառներից են:
«Այդ հետազոտության ամենահետաքրքիր մասն այն է, որ մարդիկ, որոնք մենակ են ապրել, սակայն շուն են պահել, լավ արդյունքներ են գրանցել»,- ասում է բժիշկ Մարթա Գուլատին՝ CardioSmart.org ամսագրի գլխավոր խմբագիրը:
Սրտի կաթվածից հետո վերապրած միայնակ մարդկանց շրջանում, որոնք շուն են պահել, 33%-ով քիչ է եղել մահվան ռիսկը՝ ի տարբերություն նրանց, որոնք շուն չեն պահել: Ինսուլտի դեպքում այդ ցուցանիշը կազմել է 27%:
«Մենք գիտենք, որ մենակությունն ու սոցիալական մեկուսացումը վաղաժամ մահվան հիմնական գործոններից են, և մեր հիպոթեզն այն է, որ տնային կենդանին կարող է դա մեղմել»,- ասել է հետազոտության հեղինակ Թովե Ֆոլը:
«Շուն պահող միայնակ մարդիկ պետք է հաճախ զբոսնեն իրենց շների հետ, և մենք գիտենք, որ ֆիզիկական ակտիվությունը կարևոր է ինֆարկտից կամ ինսուլտից հետո վերականգնվելու համար»,- հավելել է Ֆոլը:
