«Սպանել 15 րոպեում» ֆիլմի մասին ESem.am-ը պատմել է: Ֆիլմի գլխավոր դերակատարներից է նաև սերիալային դերասանուհի, մանեքենուհի Շուշան Երիցյանը: ESem.am-ը Շուշանից պարզել է, թե ինչպես է առաջին անգամ հայտնվել գեղարվեստական ֆիլմում և ինչ դերով է հանդես եկել:

 «Սպանել 15 րոպեում» ֆիլմում նկարահանվելու առաջարկը Շուշանն ստացել է ֆիլմի ռեժիսոր Նաիրի Հակոբյանի կողմից` անցած տարվա ամռանը: Ըստ Շուշանի` նկարահանումները տևել են մոտ մեկ տարի, քանի որ իրենք ամեն տեսարանի համար մանրակրկիտ աշխատել են:

 

Այս ֆիլմում Շուշանը մարմնավորել է հասարակ լրագրողուհու: «Իմ բարությամբ, անմեղ միամտությամբ գրավում եմ ամենահարուստ գործարարներից մեկի սիրտը: Կերպարս շատ սիրեցի: Ինձ հեգեհարազատ էր այն. այդ իսկ պատճառով իմ տեսակից շատ տարրեր եմ ներդրել»,- մանրամասնեց զրուցակիցս` որոշելով գաղտնի պահել, թե ինչպես է ավարտվում իր և գործարարի սիրո պատմությունը:

 

Ինչպես նշեցինք, Շուշանը` գլխավոր դերով առաջին անգամ է նկարահանվել գեղարվեստական ֆիլմում: Նրա խոսքով` դժվարություններ չեն եղել, քանի որ իր հետ աշխատել են պրոֆեսիոնալներ: «Ամեն բան ընտանեկան ջերմ միջավայրում է անցել, իսկ ես նախապես ժամանակ ունեի դերս իմ սեփականը դարձնելու և ամբողջությամբ զգալու համար»,- ավելացրեց մասնագիտությամբ դիվանագետ մոդելը:

Նշենք, որ ֆիլմի պրեմիերան նախատեսված է մայիսի 20-ին:

 


Զրուցեց Արևիկ Իսաջանյանը