Գյումրիում հեծանվային կուլտուրայի ձևավորման և առողջ ապրելակերպի խթանման նպատակով «ԼոգոՍ» երիտասարդական կազմակերպությունը նախաձեռնել է «Հեծանվով դեպի մշակույթ» ծրագիրը: «ԷկոԼաբ» ծրագրի շրջանակում իրականացվող ծրագրի առաջին փուլը մեկնարկեց օգոստոսի 24-ին Գյումրում: Առաջին փուլի երթուղին ընդգրկեց Գյումրու հիմնականում կենտրոնական հատվածը՝ «Թատերական» հրապարակից մինչև «Վարդանանց» հրապարակ, Պատվո բլուր և կրկին «Թատերական» հրապարակ: Երթուղին անցնում էր քաղաքի կենտրոնական փողոցներով, Սբ Աստվածածին, Ամենափրկիչ և Սբ Նշան եկեղեցիների հարակից տարածքներով: Հեծանվային արշավի ընթացքում մասնակիցները տեղեկություններ ստացան Գյումրի քաղաքի պատմամշակութային արժեք ներկայացնող վայրերի վերաբերյալ:
Հեծանվաարշավին մասնակցում էին երիտասարդներ ինչպես պրոֆեսոնալ հեծանիվներով, այնպես էլ սիրողական: Ի դեպ, ծրագիրն իրականացվելու է երեք փուլով, եթե առաջինն ընդգրկեց Գյումրին, ապա երկրորդը կլինի ՀՀ այլ տարածաշրջաններում, իսկ երրորդը՝ ԼՂՀ-ում և Ջավախքում: Ծրագրերի հաջորդ փուլերի ընթացքում գյումրեցի հեծանվորդներին կմիանան նաև հեծանվորդներ այլ վայրերից:
Ինչպես «Արմենպրես»-ին տեղեկացրեց «ԼոգոՍ» երիտասարդական կազմակերպության նախագահ Արա Մելիքջանյանը, ծրագրի նպատակն է երիտասարդների շրջանում խթանել առողջ ապրելակերպը, նպաստել պատմամշակութային արժեքների պահպանման գիտակցության բարձրացմանը և հեծանվային կուլտուրայի ձևավորմանը: Ծրագիրը նաև բնապահպանական նպատակ է հետապնդում: «Գյումրիում հեծանվային մշակույթը զարգացնելու մեծ նպատակ ունենք, ճիշտ է, շատ քչերն են Գյումրիում այսօր օգտվում հեծանիվներից, քաղաքում չկան նաև հեծանիվների համար անհ րաժեշտ արահետներ: Այդ հարցով պատրաստ ենք դիմել նաև ՏԻՄ-ին»,-նշեց Արա Մելիքջանյանը:
Արմենուհի Մխոյան
