Ավստրալական news.com պարբերականը գեղեցիկ հոդված է նվիրել Հայոց Բագրատունիների մայրաքաղաք Անիին: Հոդվածում տեղ են գտել ավելի քան 60 հազար մշտական ընթերցող ունեցող «Yomadic» ճանապարհորդական բլոգի լուսանկարները Անիի ավերակների մասին: «Արմենպրեսը»-ը ներակայացնում է հոդվածն ամբողջությամբ:
Հնագույն քաղաք Անին հիմնադրվել է ավելի քան 1600 տարի առաջ և եղել է ժամանակաշրջանի աշխարհի ամենամեծ մայրաքաղաքներից մեկը: Այսօր այն ավերակ է: Տեղակայված լինելով ներկայիս Թուրքիայի արևելյան մասում` Ստամբուլից հազարավոր կիլոմետր հեռավորության վրա, Անին կառուցվել է առևտրական բանուկ ճանապարհների խամերուկում և 11-րդ դարում վեր ածվել ավելի քան 100 հազար բնակչություն ունեցող պարսպապատ ծաղկուն քաղաքի:
Իր ծաղկման գագաթնակետին` Հայոց թագավորության մայրաքաղաք Անին եղել է հարստության, շքեղության և ճարտարապետական հրաշալիքների քաղաք: Այն հայտնի է եղել նաև որպես հազար ու մի եկեղեցիների քաղաք, իսկ նրա եկեղեցական կառույցները, արքայական պալատները և ամրոցներն իրենց տեխնիկական և գեղագիտական լուծումներով համալրել են աշխարհի առաջատար կառույցների շարքը:
Շինարարության մեջ գլխավորապես օգտագործվել է տեղական հրաբխային բազալտը, որը հեշտությամբ փորագրվում է և ունի բազմաթիվ գույներ` դեղնավունից մինչև կարմրավարդագույն և սաթի պես սև: Բագրատունիների մայրաքաղաքը և նրան շրջապատող տարածքները բազմիցս նվաճվել են Բյուզանդական կայսրերի, օսմանյան թուրքերի, քրդերի, վրացիների և ռուսների կողմից: Մինչ 1300-ական թվականները քաղաքը խոր անկում է ապրում և վերջնականապես անտերության մատնվում 1700-ականներին:
Ավելի քան 700 տարի մոռացության մատնված նրա ավերակները զոհերն են թուրք կողոպտիչների ու բարբարոսների, ովքեր փորձել են վերացնել հայոց պատմության հետքերն այդ տարածաշրջանում:
