Լեգենդար լուսանկարիչ Ռիչարդ Ավեդոնի աշխատանքները (լուսանկարներ)

10:13 - 20.Մայիս.2014

«Եթե ես գոնե մեկ օր չէի զբաղվում լուսանկարի հետ կապված ինչ-որ բանով` ինձ թվում էր, թե ես շատ կարևոր բան եմ բաց թողել. ասես մոռացել էի արթնանալ»: Ռիչարդ Ավեդոնի անունը հայտնի է բոլոր նրանց, ովքեր քիչ թե շատ կապ ունեն լուսանկարչության հետ: Այս, անկասկած, մեծ լուսանկարիչը կարողանում էր իր լուսանկարներին փոխանցել լույսի և ստվերի ` սևի և սպիտակի խորհրդավոր խաղը: Նրա բոլոր աշխատանքները երկխոսություն են մոդելի, հանդիսատեսի և նույնիսկ ինքն իր հետ, որը վարպետորեն ցույց է տալիս, թե ինչ է լուսանկարը:

Ռիչարդ Ավեդոնը ծնվել է Նյու Յորքում, լուսանկարներով հետաքրքրվել է դեռ մանկուց և մինչև նորաձևության աշխարհում հանդես գալը, նա լուսանկարում էր նավաստիներին` առևտրական նավերում և գովազդային լուսանկարներ անում խանութների համար: Ավեդոնը հաջողության հասավ "Harper’s Bazaar" ամսագրի համար արված ֆոտոշարքից հետո, երբ «նախապես մտածված» և անդեմ ստուդիաներից լուսանկարիչը մոդելներին դուրս հանեց լողափ: Նա լուսանկարւմ էր նրանց ոտաբոբիկ, ավազի մեջ թավալվելիս: Նրա անսովոր և կրքոտ մոտեցումը լուսանկարի նկատմամբ ոչ բոլորն էին հավանում, բայց, անկասկած, ոչ ոք անտարբեր չէր անցնում դրանց կողքով:

Իր կարիերայի ընթացքում Ռիչարդ Ավեդոնը հասցրել է միջազգային հայտնիների դիմանկարներ անել` Չարլի Չապլինից մինչև 90-ականների սուպերմոդելներ:

Ներկայացնում ենք ձեզ հանրաճանաչ լուսանկարիչ Ռիչարդ Ավեդոնի առավել հայտնի աշխատանքները:

Նաստասյա Կինսկին և պիթոնը

Ռիչարդ Ավեդոնի այս աշխատանքը ժամանակակից ամենահայտնի լուսանկարներից մեկն է: Այն արվել է 1981 թվականին: Երիտասարդ աստղ, դերասանուհի Նաստասյա Կինսկիի հետ ֆոտոշարքը տևել է 2 ժամ. Ավեդոնը փորձում էր որսալ բիրմայական պիթոնին անհրաժեշտ դիրքում: Ի վերջո, երբ օձը սկսեց դիպչել նրա դեմքին, Ավեդոնը սեղմեց լուսանկարելու կոճակը, և պատմության մեջ ամենահանճարեղ լուսանկարներից մեկը պատրաստ էր: