Երևանի Սունդուկյանի անվան ազգային ակադեմիական թատրոնի դերասան Նարեկ Հայկազյանը, թեև հասցրել է նկարահանվել «Հանուն սիրո», «Քաղցր կյանք» հեռուստասերիալներում, Life.panorama.am-ի հետ զրույցում առողջ հասարակություն ունենալու համար կարևորեց հատկապես թատրոնի դերը` անդրադառնալով նաև հայկական սերիալների խոցելի տեղերին և առավելություններին:
-Այսօրվա հասարակությունը թատրոնի կարիք ունի՞:
-Թատրոնը միշտ պետք է հասարակությանը, թատրոնն է վաղվա սերունդ դաստիարակողը: Ես շատ ուրախ եմ, որ վերջին շրջանում երիտասարդները շատ են հաճախում այնտեղ: Ծնողները երեխաներին պետք է բերեն թատրոն: Նրանք այնտեղ կտեսնեն իրական արվեստը` գեղեցիկն ու ճշմարիտը:
-Սերիալներն այսօր ավելի մեծ ազդեցություն ունեն հասարակական կարծիքի ձևավորման վրա: Դուք մարդկանց ուղղորդում եք որևէ կոնկրետ քայլի. սա պարտավորեցնող չէ՞:
-Ես այժմ նկարահանվում եմ «Կյանքի կարուսել» նախագծում: Մենք, որքանով կարողանում ենք, ներկայացնում ենք այսօրվա խնդիրները, դրանց լուծում ենք տալիս, կամ թողնում ենք` հեռուստադիտողը դրանց լուծումը տա: Սակայն, կարծում եմ, որ կիրթ և գրագետ հեռուստադիտողը սերիալներին նայում է իբրև ժամանցի միջոց: Մեղմ ասած` սերիալը հիմնված է կենցաղի վրա. դա այդպիսի ժանր է. ոչ մի պարտավորեցնող բան չպետք է լինի:
-Եթե ֆինանսի կարիք չունենայիք, սերիալներում կնկարահանվեի՞ք:
-Այո, դա իմ մասնագիտությունն է. դերասանը պետք է զբաղվի այդ գործով, ոչ թե ամեն պատահական մարդ:
-Հայկական սերիալների մեկ դրական և մեկ բացասական բնորոշիչ գիծ կասե՞ք:
-Դրականն այն է, որ նոր ենք անցնում սերիալների դպրոցը, բացասականն այն է, որ դեռ չենք ավարտել այն:
Շարունակությունը՝ այստեղ:
