Ֆրանսիայում գտնվել է աշխարհի բոլոր ժողովուրդների ամենասիրելի ստեղծագործություններից մեկի՝ Անտուան դը Սենտ-Էքզյուպերիի «Փոքրիկ իշխանի» մինչ այժմ անհայտ սևագիրը:

Մի կոլեկցիոներ երկու հնատիպ սևագիր թուղթ է գտել և բերել «Արտկյուրիալ» աճուրդի տուն՝ չկասկածելով անգամ, որ իր ձեռքերում «Փոքրիկ իշխանը» գրքի 17-րդ և 19-րդ գլուխների նախկինում անհայտ տարբերակներն են, փոխանցում է books.am-ը' հղում անելով «Ֆիգարո» թերթին:

Փորձագետ Օլիվյե Դևարի խոսքով՝ ենթադրվում է, որ սևագիրը գրվել է 1941թ., իսկ գիրքն, ինչպես հայտնի է, ավարտին է հասցրել 1943թ: Սակայն «Փոքրիկ իշխանի» ձեռագրի հայտնաբերումը միակ անակնկալը չէր. գտնված թղթերի մեջ կա նաև Էքզյուպերիի' 1932թ. գրած Պատագոնիայի մասին ձեռագիրը, որը գնահատվում է մոտ 50-60 հազար դոլար:

«Մեծահասակները թվեր շատ են սիրում», այդ պատճառով էլ դեռևս հայտնի է միայն, որ ձեռագրի համար կարող է վճարվել մինչև 50 հազար եվրո գումար, իսկ այն, ինչն ամենից շատն է հետաքրքրում «Փոքրիկ իշխանի» սիրահարներին՝ Էքզյուպերիի սևագիրը, որը տեղ չի գտել գրքում, դեռևս հրապարակված չէ: