Առանց ուղիղ կեցվածքի անգամ ամենաշքեղ կազմվածքը ոչինչ է. կծկվածությունը դեռ ոչ մեկին չի զարդարել: Բացի այդ, մշտապես հետևելով Ձեր կեցվածքին, դուք մեծ օգուտ եք տալիս նաև սեփական առողջությանը՝ նպաաստելով, որ լիարժեք աշխատեն բոլոր օրգանները: Առաջարկում ենք մի քանի պարզ վարժություններ պարանոցի և մեջքի համար, որոնք էլ ճիշտ կեցվածքի առաջին երաշխավորներն են:
Պարանոցի համար
Նստեք հատակին, 90 աստիճանի տակ ծալեք ոտքերը և գրկեք ծնկները: Ուղղեք մեջքը՝ մոտեցնելով իրար թիակները: Ներշնչելով գլուխը հետ տարեք՝ հնարավորինս լավ ձգելով վիզը: Կրկնեք 10 անգամ:
Կանգնեք ծնկների վրա՝ հենված ուղիղ և ձիգ դրված ձեռքերին, որոնք բացված են ուսերի լայնությամբ: Ձեռքերը, ազդրերը պետք է ուղիղ անկյուն կազմեն հատակի հետ, որպեսզի մարմնի ծանրությունը հավասարաչափ բաշխված լինի: Սկսեք գլխով պտույտներ անել՝ աջ, ձախ, վերև, ներքև: Հետո՝ հակառակ ուղղությամբ: Յուրաքաչյուր ուղղությամբ 3-6 պտույտ կատարեք:
Պառկեք փորի վրա, ձեռքերի ափերը դրեք ծոծրակին և արմունկները հետ տարեք այնպես, որ զգաք՝ թիակները մոտենում են իրար: Ճակատով կպեք հատակին: Ներշնչելով ճակատը բարձրացրեք գետնից: Վարժությունը կրկնեք 10 անգամ:
Մեջքի համար
Կանգնեք ծնկների վրա՝ ձեռքերով հենվելով հատակին այնպես, որ ձեռքերն ու ազդրերը բացված լինեն ուսերի լայնությամբ՝ ուղիղ անկյուն կազմելով հատակի հետ: Աջ ձեռքը մեկնեք առաջ, ապա վեր՝ միաժամանակ ձախ ոտքը ձիգ ու ուղիղ վիճակում տանելով հետ, ապա՝ վեր: Նույն վարժությունն արեք նաև ձախ ձեռքով և աջ ոտքով: Կրկնել վարժությունը 8 անգամ:
Պառկեք մեջքին, ոտքերը ծնկների մասում ծալեք այնպես, որ ոտքերի թաթերը հնարավորինս մոտ լինեն ազդրերին: Ձեռքերը մեկնեք կողք՝ ափերը վերև: Կրծքավանդակը վեր բարձրացրեք՝ հենվելով ձեռքերի և գլխի վրա, պահեք 2 վայրկյան, իջեցրեք: Կրկնեք 6-8 անգամ:
Եթե պարանոցի և մեջքի համար նախատեսված այս վարժությունները կատարեք ամեն օր, ձեր գեղեցիկ կեցվածքը երաշխավորված է:
