PanARMENIAN.Net - «ԵՐԵՎԱՆ. Հայացք XXI դարից». Եվրոպական ժառանգության օրերի շրջանակում ՀՀ մշակույթի նախարարության ու Երևանի պատմության թանգարանի կազմակերպած ցուցահանդեսն է, որին աջակցում է նաև PanARMENIAN Photo-ն: Այն կբացվի սեպտեմբերի 21-ին՝ ժամը 15:00. վայրը շատերին կարող է տարօրինակ թվալ՝ Երևանի մետրոպոլիտենի Հանրապետության հրապարակ կայարանն է: Ինչու տարօրինակ, որովհետև առաջին անգամ է, երբ ֆոտոցուցահանդեսը կազմակերպվում է մետրոյում, այն էլ՝ տարբեր կայարաններում: Դրանք են «Բարեկամություն», «Երիտասարդական», «Հանրապետության Հրապարակ», «Զորավար Անդրանիկ», «Գարեգին Նժդեհի հրապարակ» կայարանները:
Ցուցահանդեսը կտևեի մինչև հոկտեմբերի 21-ը, երբ կավարտվեն նաև Երևանի օրվա առթիվ կազմակերպված միջոցառումները:
Այսպիսով, մետրոյի նշված կայարաններում կարող եք տեսնել PanARMENIAN Photo-ի ու Երևանի պատմության թանգարանի ընտրած ու մշակած ընդհանուր առմամբ մոտ 180 լուսանկար, որոնք «պատմում են» 19-րդ դարեվերջի ու 20-րդ դարի առաջին կեսի Երևանի մասին: Ի դեպ, ամեն մետրոյի կայարանում ներկայացված են տեղի մետրոպոլիտենին հնարավորինս մոտ վայրերը:
Առանձնահատուկ տեղ է հատկացված թամանյանական Երևանին՝ ժամանակաշրջանի Երևանի առանձին փողոցներին, հասարակական, վարչական և անձնական նշանակության կառույցներին:
Եվրոպական ժառանգության օրերն անցկացվում են ամեն տարի՝ Եվրոպական մշակութային կոնվենցիային (1954 թ.) միացած 50 Եվրոպական երկրներում: 2013-ին Եվրոպական ժառանգության օրերի հայաստանյան խորագիրը «Ժառանգության ժառանգներն» էր. դրանք անցկացվեցին օգոստոսի 31-ին և սեպտեմբերի 1-ին: Միջոցառմանը միացել էր մոտ 60 մշակութային օջախ, բազմաթիվ պատմամշակութային հուշարձաններ իրականացրին մոտ 200 միջոցառում: Երևանի պատմության թանգարանը, որի հետ համատեղ նախարարությունն իրականացնում է այս ցուցահանդեսը, հիմնադրվել է 1931թ.-ին:
2006թ. այն հաստատվել է Երևանի քաղաքապետարանի հետ մեկ շենքում, որի ճարտարապետը Ջիմ Թորոսյանն է:
2007թ. ապրիլի 3-ին բացվել է թանգարանի մշտական «Երևանը հնագույն ժամանակներիվ մինչև մեր օրերը» հայեցակարգով ցուցադրությունը, որտեղ Երևանը ներկայացվում է ոչ միայն որպես աշխարհի հնագույն մայրաքաղաքներից մեկը, այլև որպես քաղաք, որի տարածքում գտնվում են մի քանի հազարամյակների պատմություն ունեցող մարդկային քաղաքակրթության օջախներ:
Այսօր թանգարանում պահպանվում է Երևանի պատմությունը, կենցաղն ու մշակույթը ներկայացնող մոտ 94 000 առարկա: 2008 թվականից մինչ օրս հայերեն և անգլերեն լեզուներով հրատարակվել է մոտ 18 աշխատություն: Թանգարանն իրականացնում է գիտահետազոտական, կրթական, ժամանցային և այլ ծրագրեր:
