Սույն թվականի սեպտեմբերի 17-ին, Վրաստանի խորհրդարանի Ազգային գրադարանի ցուցահանդեսային դահլիճում կազմակերպված հայ և վրացի նկարիչների աշխատանքների ցուցահանդես – վաճառքով մեկնարկեց Հայաստանի Հանրապետության անկախության 22-րդ տարեդարձին նվիրված հանդիսությունների շարքը: Միջոցառումը նախաձեռնել էր Վրաստանի հայ նկարիչների միությունը՝ Վրաստանի նկարիչների միության, Վրաստանի հայ երաժիշտների միության, Վիրահայոց թեմի «Հայարտուն» կենտրոնի հետ համատեղ և Վրաստանում ՀՀ դեսպանության գործընկերությամբ: Ցուցահանդեսին ներկայացվել էին Վրաստանի թվով 31 հայ և վրացի տարբեր տարիքի նկարիչների շուրջ 4 տասնյակի հասնող աշխատանքներ: Ցուցահանդեսի բացման հանդիսությանը ներկա էր Վրաստանում ՀՀ արտակարգ և լիազոր դեսպան պարոն Հովհաննես Մանուկյանը:
Ցուցահանդեսը ողջույնի խոսքով բացեց Վրաստանի հայ նկարիչների միության նախագահ Մերուժան Շահումյանը: Վրաստանում ՀՀ արտակարգ և լիազոր դեսպան պարոն Հովհաննես Մանուկյանը արժևորեց այն ուղին, որով ընթանում են երկու բարեկամ երկրները՝ կառուցելով իրենց պետական անկախությունը: Նա բարձր գնահատեց հայ նկարիչների հետ միասին վրացի նկարիչների մասնակցությունը երկու ժողովուրդներին կամրջող միջոցառումներին, որոնցից մեկը այս ցուցահանդեսը նվիրված է ՀՀ անկախության 22-րդ տարեդարձին:
Թբիլիսիի Սբ. Էջմիածին եկեղեցու լուսարարապետ Տեր Մանուկ քահանա Զեյնալյանն իր օրհնությունը բաշխելով ներկաներին, հանուն Վիրահայոց թեմի առաջնորդ տեր Վազգեն եպիսկոպոս Միրզախանյանի, փոխանցեց նրա շնորհավորանքներն ու բարեմաղթանքները ցուցահանդեսի կազմակերպման կապակցությամբ: Նա կարևորեց ազատության և անկախության գեղեցկությունը, որ այնպես բարձրարժեք արտահայտվել է ցուցահանդեսին տեղ գտած կտավներում:
Հայ ժողովրդի ՀՀ անկախության 22-րդ տարեդարձին նվիրված հայ և վրացի նկարիչների ցուցահանդեսի կազմակերպումը ողջունեցին Վրաստանի նախագահի խորհրդական, «Վրաստան» թերթի խմբագիր Վան Բայբուրթյանը, Վրաստանի նկարիչների միության նախագահ Գուրամ Ցերցվաձեն, Վրաստանի հայ երաժիշտների միության նախագահ Արտեմ Կիրակոզովը:
Հանդիսությունն ընթանում էր Թբիլիսիի Վանո Սարաջիշվիլու անվան պետական կոնսերվատորիայի ուսանողներ Ելենա Շաշիաշվիլիի, Մարիանա Կիրակոզովայի, Մարիամ Չիկվաիձեի և Գվանցա Մաթիաշվիլիի կազմով «Լալե»լարային քառյակի նվագակցությամբ:
