Կանադացի դերասան եւ երաժիշտ Կորի Մոնտեյթը, ով հայտնի է ամերիկյան հանրահայտ «Խոռ» սերիալում խաղացած դերով, հայտնաբերվել է մահացած՝ Կանադայի Վանկուվեր քաղաքի Վանկուվերի Pacific Rim հյուրանոցի համարում: Այս մասին տեղեկությունն այսօր տարածել է Ռոյթերս գործակալությունը' վկայակոչելով ոստիկանությանը: 31-ամյա դերասանի մահվան պատճառը պարզվում է, բայց, ինչպես տեղեկացնում է ոստիկանությունը, նրա վրա բռնության հետքեր չեն հայտնաբերվել: Նրա մարմինը հայտնաբերել են հյուրանոցի աշխատակիցները, երբ նկատել են, որ նա ժամանակին դուրս չի գրվել հյուրանոցից: CBS News հեռուսաընկերության տվյալներով՝ դերասանը, ըստ ամենայնի, մահանալու ժամանակ մենակ է եղել հյուրանոցում : Ամերիկյան լրատվամիջոցները տեղեկացնում են, որ ապրիլին Մոնտեյթը դիմել էր վերականգնողական կենտրոն' թմրամիջոցների կախվածությունից բուժվելու համար: