Փետրվարի 11-ին կյանքից անսպասելիորեն հեռացավ ամերիկյան փոփ, սոուլ, ռիթմ-ն-բլյուզ ժանրերի լեգենդար երգչուհի, դերասանուհի, պրոդյուսեր եւ նախկին մոդել Ուիթնի Էլիզաբեթ Հյուսթոնը (նա կատարելությանը մոտ կազմվածք է ունեցել՝ 86-66-86-ը և մինչ երգչուհու կարիերա սկսելը հայտնի է եղել իբրև մոդել): Հյուսթոնն այնքան շատ մրցանակների է արժանացել, որ դրանք գրեթե հնարավոր չէ ամբողջությամբ թվարկել: Նա 6 անգամ ստացել է «Գրեմմի», 15 անգամ' «Billboard Music Awards», 21 անգամ'«American Music Award», 2 «Emmy», 8 «Soul Train Music Awards», բազմաթիվ տիտղոսներ եւ այլ պարգևներ:
Ըստ Գինեսի ռեկորդների գրքի' Հյուսթոնը բոլոր ժամանակների ամենատիտղոսակիր կին արվեստագետն է (The Most Awarded Female Artist of All Time): Նրա ձայնագրությունների վաճառքի ընդհանուր ծավալը կազմում է 170 մլն օրինակ: Rolling Stone ամսագիրը Հյուսթոնին ընդգրկել է 100 մեծագույն կատարողների ցուցակում:
Ուիթնի Էլիզաբեթ Հյուսթոնը ծնվել է 1963 թ. օգոստոսի 9-ին: Նա Ջոն և Սոսսի Հյուսթոնների ընտանիքի երեք երեխաներից կրտսերն էր: Աղջկա մայրը, մորաքրոջ աղջիկն ու կնքամայրը հայտնի երաժիշտներ են եղել, և նրանց միջավայրում մեծացած ՈՒիթնիի համար կարծես կանխորոշված է եղել երգչուհու ապագան: Արդեն 11 տարեկանում ՈՒիթնին սկսել է երգել եկեղեցական երգչախմբում: Մանկության տարիները նշանավորվել են հատկապես մի դեպքով, որ հետագայում լրատվամիջոցներին է պատմել նրա մայրը: Խոսքը մի դժբախտ պատահարի մասին է, երբ Ուիթնին հագուստի կախիչով եղբոր հետ խաղալիս վայր է ընկել, ու կախիչը ծակել է նրա կոկորդը: Աղջկան տեղափոխել են հիվանդանոց: Բժիշկները ոչ մի հույս չեն տվել, որ նա երբևէ կկարողանա խոսել: Բայց նա խոսեց, երգեց ու դարձավ համաշխարհային մեծության աստղ:
1985 թ. թողարկվեց Ութնի Հյուսթոնի առաջին ալբոմը' «Whitney Houston»-ը: Հենց այս ալբոմն էլ իր հետ բերեց առաջին հաջողությունները' առաջին «Գրեմմի»-ն, առաջին շրջագայությունը: Ալբոմի «You Give Good Love» երգն արժանացավ «U.S. Billboard Hot 100»-ի երրորդ հորիզոնականին, իսկ ՈՒիթնի Հյուսթոնի անունը քննադատների մոտ սկսեց շրջանառվել իբրև վերջին տարիների նոր ձայներից ամենահիացնողը:
Չնայած առաջին երկու ալբոմների համաշխարհային հաջողություններին' աֆրոամերիկյան մի շարք քննադատներ նշեցին, որ Հյուսթոնի երաժշտությունը «չափազանց սպիտակ» է, եւ դա է պատճառը, որ այն վաճառվում է: Առաջին քննադատությունից հետո երևան եկավ նոր բացասական կարծիք, թե նրա ձայնագրություններում չկա զգացմունքայնություն, ինչն առկա է նրա՝ կենդանի ձայնով համերգների ժամանակ: Հյուսթոնը, սակայն, չափազանց ուժեղ կին էր քննադատությունից կոտրվելու համար: Նրա պատասխանը չուշացավ. «Եթե ուզում եք ունենալ երկար կարիերա, «սպիտակ երաժշտությունն» անխուսափելի ճանապարհ է, եւ ես այդ ճանապարհի վրա եմ: Բացարձակ չեմ ամաչում դրանից»: Չուշացավ նաև այն կատարումը, որ լռեցրեց քննադատներին և ապահովեց Ուիթնի Հյուսթոնի հռչակը: «Թիկնապահը» ֆիլմի համար երգչուհին ձայնագրեց 6 երգ, որոնցից «I Will Always Love You»-ն («Ես քեզ միշտ կսիրեմ») ցնցեց աշխարհը, ցնցեց ոչ թե իբրև ֆիլմի սինգլ, այլեւ իբրև երգարվեստի մի մեծ նվաճում: 14 շաբաթ շարունակ երգը գլխավորեց «Billboard Hot 100»-ը, վաճառվեց 43 միլիոն օրինակով և մինչ օրս մնում է լավագույն սաունդթրեքների թվում: Այս երգն Ուիթնիին բերեց միանգամից երեք «Գրեմմի»:
Ութնի Հյուսթոնը այն արվեստագետներից է, ում անձնական կյանքն անմիջականորեն ազդեց կարիերայի վրա: Այս դեպքում' բացասական իմաստով: Ամեն ինչ կարող էր այլ ընթացք ունենալ, սակայն գանք սկզբից...
80-ականների վերջին ՈՒթնիին խենթի պես սրահարված է եղել Ռոբերտ դե Նիրոն: Իր սերը դերասանը չի թաքցրել. «Նա իմ տեսած բոլոր կանանցից ամենասեքսուալն է: Նա հիասքանչ է: Ես ուզում, որ նա ինձ հետ լինի»: Ուիթնիի կյանքի մի այլ պատմություն էլ կապված է Էդի Մերֆիի հետ: Հյուսթոնը համարվում էր վերջինիս նշանածը: Էդի Մերֆին' հմայիչ, հարուստ, տաղանդավոր, հռչակավոր, եւ, որ ամենակարեւորն է, շատ պարկեշտ վարքով դեպի ՈՒիթնին, այդպես էլ չարժանացավ նրա սիրուն: «Իմ ու Էդիի միջեւ ավելի շատ փոխադարձ ընկերություն կար, քան կիրք», - խոստովանել է Հյուսթոնը: Նա չի թաքցրել նաև, որ հանգիստ ու հարթ հարաբերություններն իրեն վախեցել են ավելի, քան որեւէ ուրիշ բան: Նրա ծնողները երկար տարիներ ապրել են ամուսնական լիարժեք համաձայնության մեջ: Ութնին չի մտաբերել մի դեպք, որ ծնողները վիճեն, կամ առնվազն, չհամաձայնեն իրար հետ որևէ հարցում, լինի դա նոր ավտոմեքենայի ընտրություն, թե երեխաների դաստիարակություն: Ծնողներից նա լսել է միայն՝ «Դու ճիշտ ես, սիրելիս, արա, ինչպես ուզում ես» կամ «Ես ամեն ինչ կանեմ այնպես, ինչպես ուզում ես, սիրելիս»: Նույն կերպ միաձայն էլ Ուիթնիի ծնողները մի օր ընդունել են ամուսնալուծության որոշումը և հայտնել երեխաներին' հանգիստ եւ բարեկամական ժպիտով:
15-ամյա աղջիկը երկար ժամանակ կորցրեց ժպտալու կարողությունը: Նրան միշտ իր ընտանիքը անթերի էր թվացել, բայց մի օր նա հասկացավ, որ իր ծնողները երբեք կապված չեն եղել իրար, այլ ունեցել են ընդհանուր սիրո օբյեկտ' երեխաները: Պարզվեց, որ նրա մայրը, լինելով հաջողակ վոկալիստ, շրջագայությունների ճանապարհին ժամանակ չի վատնել և աջ ու ձախ դավաճանել է ամուսնուն: Հայրն էլ ժամանակ առ ժամանակ այցելել է իր սիրուհիներին: Հենց այդ պահից էլ ՈՒիթնին որոշեց. «Գրողի ծոցը: Չեմ ամուսնանա մի մարդու հետ, որի մասին ոչինչ չեմ ունենա ասելու բացի այն, որ նա հանգիստ ու խոհուն է»:
Ի տարբերություն Էդի Մերֆիի' Հյուսթոնի ընտրյալը' Բոբի Բրաունը, բոլորից քիչ էր նման հանգիստ ու խոհեմ մարդու: Նա, մեղմ ասած, վատ համբավ ուներ'ալկոհոլիզմ, բազմաթիվ ձերբակալություններ, երեք ապօրինի երեխա տարբեր կանանցից: Կյանքի ընկեր ընտրելով նման մարդուն' Ուիթնին մարտահրավեր նետեց բոլորին: «Բոբին այնքանով է լավ, որ չի կարող բացահայտվել նրա որևէ թաքնված թերություն», - կատակով մի անգամ ասել է ՈՒիթնին:
1992 թ. նրանց ամուսնությունը ստացավ «տասնամյակի հարսանիք» անունը: 800 հյուրեր, 10.000 վարդեր, հարսի 3 մետրանոց քող… Այս ամենը նման էր հեքիաթի, բայց ռոմանտիկ հեքիաթը շուտով վերածվեց իսկական թրիլլերի: Ամեն ինչ սկսվեց հենց ՈՒիթնիի դերից «Թիկնապահը» ֆիլմում: Ֆիլմի հետ եկան միջազգային ճանաչումն ու մի քանի միլիոն դոլար գումար: Այս ամենը զայրացրեց Բոբբիին, ով պարզապես սկսեց նախանձել կնոջ փառքին:
ՈՒիթնին հղի էր, երբ սիրելի ամուսինն աջ ու ձախ խաբում էր նրան: Դստեր ծնունդը ոչինչ չփոխեց: Մի քանի ամիս անց ՈՒիթնին դիմեց պոլիկլինիկա: Նրա դեմքին մի մեծ վերք կար: Կինն ասաց բժիշկներին, որ լողալիս դեմքով ժայռին է հարվածել, բայց բոլորը հասկացան, որ վերքը Բոբբիի ձեռքի գործն է: Վերջինիս քննադատեցին բոլորը, բացի ՈՒիթնիից: «Ոչ, նա չի ծեծում ինձ, այդ ես եմ երբեմն նյարդայնացած ժամանակ խփում նրան»,- շարունակ թաքցնում էր երգչուհին:
Հինգ տարվա ամուսնական կյանքի ընթացքում Ուիթնին ժամանակ չունեցավ զբաղվելու իր կարիերայով: Այս ընթացքում նա չթողարկեց ոչ մի ալբոմ: Իսկ մի օր, երբ նա վերջապես բեմ դուրս եկավ… Այդ երեկո ՈՒիթնին համերգասրահ մտավ շատ ցրված: Նախօրեին կրկին վիճել էին: Հարբած Բոբբին «լավ վարձատրել էր» նրան «Որտե՞ղ էիր, սիրելիս» հարցի համար… Մի խոսքով, Ուիթնին երգելու մասին չէ, որ մտածում էր, սակայն պետք էր երգել: Նա փորձեց կատարել իրենից պահանջվող ծրագիրը' «I Will Always Love You» երգը: Բայց ամենապատասխանատու պահին' երգի ամենաբարդ հատվածում, երբ պետք էր վերցնել բարձր նոտան, նա լռեց: Փառք Աստծո, նրա եղբայրը, ով երկար ժամանակ աշխատել է քրոջ թիմում իբրև բեքվոկալիստ, փրկեց իրավիճակը: Կուլիսներում նա հարցրեց քրոջը . «Ի՞նչ է պատահել»: «Ես չգիտեմ», - շշնջաց ՈՒիթնին: Հետո նրան զննեցին բազում բժիշկներ' ոչ պաթոլոգիա էր, ոչ էլ այլ բան. քրոնիկ սթրես էր:
Դա տեղի ունեցավ 1994 թվականին' ամուսնությունից երկու տարի անց: «Ես փորձեցի բացատրել ինքս ինձ, որ սերը պետք է լինի խենթ, որ ես սիրում եմ միայն «կյանքի մարդկանց» ու ինձ պետք չեն ձանձրալի ու անտարբեր մարդիկ»: Սակայն անգամ այդ բացատրությունները վերջապես ուժ չունեցան: 2006 թվականին ՈՒիթնին դիմեց դատարան' ամուսնալուծվելու, որ ի կատար ածվեց ապրիլի 24-ին' բացի ամուսնալուծությունից տալով երգչուհուն նաև աղջկա'Քրիստինայի դաստիարակության իրավունքը:
Ամուսնալուծությունից հետո Բոբին չլռեց: Նա հանրությանը պատմեց, որ նախկին կինն ամուսնությունն օգտագործել է իր համասեռամոլական լինելը թաքցնելու համար և որ ներգրավել է իրեն թմրանյութերի օգտագործման մեջ: Ի պատասխան, երգչուհին չցանկացավ որևէ կերպ հակադարձել, ասաց միայն, որ ուզում է այդ մարդուն հավերժ թողնել անցյալում:
Եվ դա բնական որոշում էր. ամուսնությունից հետո նրա կյանքն իրոք դժոխքի էր վերածվել: Նա հաճախ ուշանում էր համերգներից, հարցազրույցներից: Նրա մոտից ոստիկանության աշխատակիցները հաճախ առգրավում էին տարբեր տեսակների և քանակի թմրանյութ:
Մի անգամ լրագրողներից մեկի հարցին, թե օգտագործում է արդյոք ինքը կոկոին, պատասխանեց. «Եկեք պարզ խոսենք, լա՞վ: Նախ, եկեք մի բան հասականանք. կոկաինը շատ էժան է, իսկ ես վաստակում եմ չափազանց շատ' կոկաին ծխելու համար: Ես չեմ օգտագործում կոկաին»: Սակայն հետագայում բազմիցս խոստովանել է, որ օգտագործում է տարբեր թմրամիջոցներ հավաքույթների ժամանակ:
Ամուսնալուծությունից հետո Հյուսթոնը բուժման երկու երկարատև կուրսեր անցավ թմրանյութերից կախվածության բուժման կլինիկայում, հաջողությամբ ավարտեց վերականգնողական կուրսերը: Մի քանի ելույթներ ունեցավ, որոնց ժամանակ բավական առույգ տեսք ուներ: Կյանքի վերջին շրջանում, սակայն, նորից սկսեցին լուրեր պտտվել նրա կախվածության մասին: Ու ոչ մի բան չխանգարեց, որ աշխարհահռչակ երգչուհու մահը մամուլն այսօր կապի անձնական խնդիրներից սթրեսների, թմրանյութի չափաքանակի չարաշահման հետ:
Ես վաղուց որոշել էի չքայլել ինչ-որ մեկի ստվերում. թե ձախողվելու, թե հաջողելու դեպքում համենայն դեպս այն արած կլինեմ, ինչին ես եմ հավատում:
Հենց սկզբից էլ ես եւ տեսախցիկը լավ ընկերներ ենք եղել. ես նրան եմ սիրում, նա՝ ինձ:
Միշտ ցանկացել եմ լինել ավելի զգացմունքային՝ դրսում որսալու համար այն ամենը, որ նախատեսված է իմ ներսի համար:
Ես հավատում եմ, որ երեխաներն ապագան են: Նրանց լավ սովորեցրեք եւ թողեք, որ իրենք առաջնորդեն իրենց: Ցույց տվեք այն ողջ գեղեցիկը, որ ունեն նրանք իրենց ներսում:
Երբ որոշեցի երգչուհի դառնալ, մայրս զգուշացրեց՝ շատ մենակ եմ լինելու: Մենակությունը ծնվում է կյանքի հետ:
