Հաջողության ճանապարհին ամենամեծ խոչընդոտ կարող է դառնալ սեփական ուժերի հանդեպ անվստահությունը, համոզվածությունը, որ երբեք չես կարողանա հաջողության հասնել: Այս սահմանափակումները մարդն ինքն է դնում իր առջև: Այդ պատճառով դրանք հաղթահարելու համար առաջին հերթին պետք է վերլուծել ինքն իրեն, իսկ ներքին սահմանափակումների պատճառները կարող են մի քանիսը լինել.
Անինքնավստահություն: Երբեմն մարդը համակերպվում է հաջողության հասնելու անհնարինության հետ: Նա փորձում է ինչ-որ բան փոխել, սակայն չի ստացվում: Այս դեպքում որոշ մարդիկ հանձնվում են ավելի շուտ, քան ամբողջապես կտրվեին գործին, և ի վերջո ինքներն են ոչնչացնում հաջողության հնարավորությունը: Հիշե՛ք՝ ցանկացած փոփոխություն հնարավոր է միայն ինքնավստահ լինելու պայմանով, իսկ դա պահանջում է համառություն և էներգիայի ծախս:
Վաղաժամ հիասթափություն: Շատերն են փորձում ինքնակատարելագործմամբ զբաղվել, սակայն անհաջողության են մատնվում: Եթե դա տեղի է ունենում մեկը մյուսի հետևից, ապա կարող է ձևավորվել «միևնույն է անիմաստ է» բարդույթը: Ցանկացած փոքրագույն խոչընդոտ կսկսի ուժերի անկման հանգեցնել և, բնականաբար, անհաջողությունները կկրկնվեն նորից ու նորից: Անգամ եթե արդյունքը, որին հասնում եք մեծ չէ, թևաթափ մի՛ եղեք: Իրականում հնարավոր է առաջանան լուրջ խոչընդոտներ, որոնց բախվելիս մարդը կարող է հետ կանգնել: Սակայն, հաղթահարելով հիասթափության զգացումը, կարող է պայքարի մեջ մտնել կրկնապատկված ջանքերով և իր գործում ավելի հաջողակ դառնալ, քան որևէ մեկը:
Աջակցության պակաս: Երբ մարդը փորձում է ինչ-որ բան փոխել, առաջանում է որոշակի ռիսկ. հնարավոր են անհաջողություններ, անորոշություն, ընդունված կարգերի խախտում: Այս դեպքում հարազատների աջակցությունը կօգնի հաղթահարել փոփոխությունների ընթացքում առաջ եկող բարդությունները:
Շրջապատի կողմից փոփոխություններին դեմ լինելը: Յուրաքանչյուր մարդ կապված է բազմաթիվ այլ մարդկանց հետ, որոնք ցանկանում են անփոփոխ պահել նրա մեջ կատարած իրենց ներդրումները. նրանց անհրաժեշտ է մարդ, որին իրենք ճանաչում են: Մարդու մեջ կատարվող ցանկացած փոփոխություն սպառնում կամ անհանգստություն է մտցնում նրանց կյանք: Մարդիկ հաճախ փորձում են խոչընդոտել մտերիմների՝ փոխվելու ձգտմանը՝ վերջիններիս ենթարկելով կասկածի և ծաղրի: Մտածե՛ք՝ միգուցե Ձեզ պետք է մի քիչ էգոիստ լինել:
Իրական հնարավորություններ: Կան մարդիկ, որոնք մյուսներից ավելի հեշտությամբ են գնում բազմատեսակ փոփոխությունների և իրականացնում դրանք: Երիտասարդն ավելի մեծ հնարավորություններ ունի իր ձեռնարկումներում հաջողության հասնել, քան տարեց մարդը: Սակայն բեկումնային առաջընթաց կարող է կատարել ով ասես: Փորձե՛ք իրատեսորեն գնահատել Ձեր հնարավորությունները: Ձեր ֆանտազիաները կարող են այդպես էլ մնալ երևակայության մակարդակում, իսկ իրական հաջողությունն իր սկիզբն է առնում առօրյա իրադարձություններում և արարքներում:
