Վիեննայում անցկացվելիք  հոբելյանական 60-րդ  «Եվրատեսիլ» երգի մրցույթում Ռուսաստանը կներկայացնի Պալինա Գագարինան`  «A million voices» երգով: «Արմենպրես»-ի փոխանցմամբ` այս մասին հայտնում է ՏԱՍՍ գործակալությունը:

Երգչուհու պրոդյուսեր Կոնստանտին Մելաձեն նշել է, որ ռուսաստանյան ներկայացուցչի երգը լինելու է «խաղաղության ուղերձ»: «Վստահ եմ, որ Պոլինան ավելի քան արժանի է ներկայացնելու Ռուսաստանը  երգի հայտնի  մրցույթում: Նա կատարելու է խաղաղությանը նվիրված երգ: Ներկայումս ընթանում են համարի պատրաստման աշխատանքները:  Երգչուհին ելույթ է ունենալու ռոմանտիկ կերպարով»,- ասել է Մելաձեն:

Նա ընդգծել է, որ երգչուհու ընտրությունը պայմանավորված չէ նրա հանրաճանաչ ազգանվամբ:«Այսօրվա դրությամբ` Պոլինան ռուսատանյան լավագույն վոկալիստներից է: Նա ունի փորձ, ձայնային և արտաքին համապատասխան տվյալներ»,- նշել է երգչուհու պրոդյուսերը:

Պոլինա Գագարինան ռուսական «Ֆաբրիկա զվյոզդ-2» մրցույթի հաղթողն է: Նա արդեն թողարկել է երկու ձայնասկավառակ, իսկ ներկայում աշխատում է երրորդ ձայնասկավառակի ստեղծման վրա:

Հոբելյանական 60-րդ «Եվրատեսիլ» մրցույթը կկայանա Վիեննայում 2015թ. մայիսի 19-23-ը։