Ֆրանսիացի դերասան Ժերար Դեպարդիեն Մոսկվայում ներկայացրել է ժամացույցների «Հպարտանում եմ ռուս լինելով» հավաքածուն, տեղեկացնում է «Արմենպրես»-ը՝ հղում անելով «Ռոսիա 24» հեռուստաալիքին:
Լյուքսային բրենդի նոր ժամացույցների շնորհանդեսը տեղի է ունեցել Four Seasons հյուրանոցում (նախկին «Մոսկվա» հյուրանոց):
Ժամացույցները մշակվել են CVSTOS երիտասարդ շվեյցարական բրենդի հետ: Տարբեր մոդելների գները նշված են շվեյցարական ֆրանկով: Ամենաէժան ժամացույցներն արժեն 15 հազար ֆրանկ (ավելի քան 1 մլն ռուբլի): Ներկայում թողարկված է մի քանի հարյուր ժամացույց: Սպասվում է կանանց ժամացույցների հավաքածուի պատրաստումը:
Դերասանն ասել է, որ այդ ժամացույցների շքեղությունը որոշվում է ոչ թե ռուբլով դրանց գնով, այլ ռուսների հոգեւոր ուժով: Դեպարդիեն այն կարծիքին է, որ Ռուսաստանն ի զորու է հաղթահարել տնտեսական ճգնաժամի եւ միջազգային պատժամիջոցների հետեւանքները, եթե նրան հանգիստ թողնեն:
66-ամյա դերասանը Ռուսաստանի քաղաքացիություն է ստացել գրեթե երկու տարի առաջ: Բացի այդ, նա ունի Ֆրանսիայի եւ Բելգիայի անձնագրեր, հաղորդել է «Ինտերֆաքս»-ը:
