Երգչուհի Սիլվա Հակոբյանի մուտքը շոու բիզնես կայծակնային էր. 2006 թվականին նա երգեց «Գիշեր է» երգը, որը միանգամից հիթ դարձավ, զուգահեռ հայտնի դարձավ, որ 17-ամյա աղջիկը մասնակցել է «BBC»-ի կազմակերպած մրցույթին ու հաղթանակ բերել Հայաստանին: Սրանից հետո նրա անունը թնդաց երկրով մեկ: ESem.am-ը   հետաքրքիր հիշողություններ արթնացնող բլից հարցազրույց է ունեցել Սիլվայի հետ:)

- Ինչպե՞ս կբնութագրես երգացանկդ:

-  Բավականին բազմաժանր:)

-  Ո՞րն է նախընտրածդ երաժշտական ոճը:

-  Քանի որ մասնագիտության բերումով ամեն տեսակ բան երգում ենք, կարելի է ասել՝ ամեն տեսակ երաժշտություն էլ լսում եմ, սակայն դա կախված է տարամադրությունից: Հիմնականում՝ պարային, լինում են նաև մեղեդային երգեր:

-  Ո՞րն է եղել առաջին երգդ:

- Մանկությանս տարիներին եղել է «Հեքիաթ» երգը, իսկ որպես տեսահոլովակ՝   «Գիշեր է»-ն:

-  Ե՞րբ է եղել առաջին բեմելդ:

-  4 տարեկանում, Վայքի Մշակույթի տան բեմում:

-  Երգացանկիցդ ո՞ր երգն ես ամենաշատը սիրում:

-  Մի քանիսը կնշեմ՝ «Գիշեր է», «Ուշացել եմ», «Դե գնա», «Սիլոյի պարը», «Մռութիկ», «Շնորհավոր»:

-  Երաժշտական բնագավառում կուռք ունե՞ս:

- Կուռքեր չունեմ, քանի որ նրանց նկատմամբ սերն այլ կերպ է դրսևորվում, սակայն շատ եմ սիրում այն արվեստը, որը ներկայացնում է Բեյոնսեն:

-  Կա՞ երգիչ, ում հետ կուզենաս զուգերգով հանդես գալ:

-  Բեյոնսեն, Սելին Դիոնը:

-  Կա՞ միջազգային հիթ, որը շատ ես ցանկանում կատարել:

-  Glenn Lewis-ի  «Fall again» երգը, որը  2006 թվականից մինչ օրս կա հեռախոսիս մեջ ու անդադար լսելով չեմ հոգնում: Շատ գեղեցիկ երգ է:

- Ո՞րն է եղել ստացածդ առաջին մրցանակը:

- «Շնորհալիներ-95» փառատոնի ժամանակ ստացածս մրցանակը, որը պահում եմ մինչև հիմա:

-  Իսկ ամենաթա՞նկ մրցանակդ:

- Մրցանականեր շատ եմ ստացել, «BBC»-ի մրցանակը շատ եմ կարևորում, սակայն ինձ համար ամենամեծ մրցանակը հանդիսատեսի սերն է:

- Այս բնագավառում առաջին լուրջ ձեռքբերումդ ո՞րն է եղել:

- Իմ առաջին մենահամերգը համալիրում, որին հաջորդեց նաև երկրորդը: Դա շատ ռիսկային քայլ էր իմ կողմից. այդ ժամանակ 21 տարեկան էի ու ներկայացա  տասը հազարանոց դահլիճի առաջ: Կարծում եմ՝ ամեն մեկը չէր կարող անել:

- Երգարվեստում քո խորհրդատուն ու քննադատն ո՞վ է:

- Ընտանիքս, առաջին հերթին՝ հայրս:

- Քանի՞ տարի ես բեմում:

- Եթե 4 տարեկանից բեմում եմ, ստացվում է՝ 22 տարի:

- Ո՞վ է քո հայտնի ընկերը շոու բիզնեսից:

- Շոու բիզնեսում բոլորի հետ ունեմ ջերմ հարաբերություններ, ինչը փոխադարձ է, քանի որ ես կոնֆլիկտային մարդ չեմ:

- Ի՞նչ տվեց քեզ հայտնիությունը:

- Իմ մեջ հատուկ փոփոխություններ չեն եղել: Հաստատ չգոռոզացրեց, ուղղակի ավելի շատ պատասխաանատվություն տվեց ամեն ինչի հանդեպ՝ թե՛ իմ աշխատանքում, թե՛ առօրյայում: Ինչու չէ, հաճելի է, որ ճանաչում են, թեև շատ դեպքերում էլ հայտնիությունը խանգարում է: