Նիդերլանդական ռադիոյի ծրագրերում օգոստոսի 22-ին կարծես հատուկ կարգով շատ են հիշել համաշխարհային մեծության հայ կոմպոզիտոր Արամ Խաչատրյանի ստեղծագործությունները: Ինչպես «Արմենպրես»-ին տեղեկացրին «Նիդերլանդական Օրագրից», օգոստոսի 22-ին ռեկորդային թվով ռադիոկայաններ են անրադարձել Խաչատրյանին:
Վերջին ժամանակներում նիդերլանդական տարբեր ռադիոկայանների եթերով հաճախ հնչում են Արամ Խաչատրյանի տարբեր ստեղծագործությունները: Ներկայացվում են նաև մեծ կոմպոզիտորի ու նրա ստեղծագործությունների մասին ծանոթություններ, ժամանակագրական տեղեկություններ:
Օրինակ՝ «Discover classical» ռադիոկայանով հնչել է հատված «Սպարտակ» բալետից` Վիեննայի սիմֆոնիկ նվագախմբի կատարմամբ, տևական ժամանակ առաջին ռադիոկայանով հնչել է հատված «Գայանե» բալետից: «Ռադիո 3»-ը ևս եթերում հնչեցրել է Արամ Խաչատրյանի գործերից, իսկ ահա «Classic FM»-ը՝ տաղանդավոր կոմպոզիտորի «Masquerade»-ը` Հայաստանի ֆիլհարմոնիկի կատարմամբ (Լորիս Ճգնավորյանի ղեկավարությամբ) և Մոսկվայի Մեծ թատրոնի նվագախմբի կատարմամբ մի հատված «Սպարտակ» բալետից:
Այդ օրը Ա.Խաչատրյանին են անրադարձել նաև միջազգային այլ ռադիոկայաններ, մասնավորապես Նյու Յորքի հանրային ռադիոն նրա 4 գործեր է եթեր հեռարձակել: «BBC Music classical» ռադիոկայանը ևս հետ չի մնացել և իր ծրագիրը համալրել է աշխարհահռչակ հայ կոմպոզիտորի հայտնի գործերով, նաև սեփական կայքում զետեղել նրա մասին ընդարձակ հոդված:
Ա. Խաչատրյանի ստեղծագործությունների մասին հանրագիտարանային լայն տեղեկություններ է հայտնում նաև հոլանդական home.online.nl կայքը:
