«Այդ օրը գործեր ունեինք. մի հարսանիք էինք կազմակերպել, որը հենց հունիսի 14-ին էր և որոշեցինք 13-ի երեկոյան նշել մեր օրը,- ասաց Մանոն ու հավելեց, որ այդ երեկո ֆուտբոլ կար, ընկերների հետ գնացել են  ֆուտբոլ դիտելու: -Հիշեցինք, թե որտեղից ուր ենք հասել, պատմեցինք` ինչն ինչպես է եղել: Հետաքրքիր, հաճելի երեկո ունեցանք»: Դերասանուհին հայտնեց նաև, որ այդ օրը բավականին շատ  քայլել են. մի բան, որ վերջին շրջանում հազվադեպ են անում` զբաղվածության պատճառով:

«Արդեն ամսի 14-ին հարսանիքի տեղում նշեցինք նաև մեր հարսանիքի օրը: Ի սրտե կազմակերպեցինք իրենց հարսանիքն ու ասացինք` մեր լավ տարոսը` ձեզ»,- ասաց պարուհի-դերասանուհին:

Ըստ Մանոյի` ընտանեկան կյանքում ամենակարևոր բանը փոխզիջումն է: Դերասանուհին, որպես ամուսնու բնավորության ամենալավ կողմ, նշեց իրեն շատ սիրելը:) «Իր մոտ դրանից շատ բան է կախված, նրա բնավորությունն էլ է փոխվում, գործնական շատ հարցեր էլ են փոխվում: Ես Սարգսի պահապան հրեշտակն եմ, նա գիտի դա, ու եթե Աստված չանի, մի օր նեղացրեց ինձ կամ նեղացած դուրս եկավ տանից, իր մոտ ամեն ինչ վատ է լինում:)»,- ասաց դերասանի կինը, ով  Սարգսի բնավորության  ամենավատ, միաժամանակ,  ամենալավ գիծը համարում է ծայրահեղական լինելը: «Նա և՛ լավի մեջ է ծայրահեղ, և՛ վատի: Սակայն  նրա ծայրահեղ վատը` այն, որ, լինելով ծայրահեղ էմոցիոնալ, կարող է նեղացնել, իմ կողքին չի արտահայտվում»,- հպարտությամբ ասաց Մանոն և հավելեց, որ ինքն էությամբ շատ հանդարտ է և չի նյարդայնացնում ամուսնուն:

«Վեճեր հաճախ չենք ունենում: Ես Սարգսին շատ լավ եմ ճանաչում և անգիր գիտեմ` որ բառից հետո ինչ կարող է լինել իր հետ: Աշխատում եմ սուր անկյուններ չստեղծել: Նա էլ շատ թեթև մարդ է և, եթե անգամ կռվենք, դա շատ չի խորանում»,- ավելացրեց Մանոն:

Դերասանուհու փոխանցմամբ` իրենք երջանիկ զույգ են. «Երջանկությունը խաղաղություն է: Դու կարող է սիրես, բայց հանգիստ չլինես, իսկ երբ սիրում ես, սիրված, միաժամանակ, քեզ հանգիստ ու ներդաշնակ ես զգում, դա արդեն մեծ երջանկություն է»: