Անաստասիա Կամենսկիխը ծնվել է 1987 թվականի մայիսի 4-ին Կիևում: «Կամենսկիխ»-ը երգչուհու ոչ թե հոր, այլ մոր ազգանունն է: Սակայն նա մոր ազգանունն է կրում ոչ թե ընտանեկան խնդիրների կամ մայրիշխանության պատճառով, այլ բարեհնչյունության համար: Ընդ որում' նա ստացել է այդ ազգանունը ծնված օրից: «Նաստյա Կամենսկիխն իմ իրական անուն- ազգանունն է, որ ստացել եմ ծնվածս օրից, քանի որ մորս ի սկզբանե դուր չի եկել հորս ազգանունը: Մայրս միշտ իմացել է, որ իր աղջիկը մի օր հայտնի պիտի դառնա և մտահոգված է եղել նրա անվան բարեհնչյունության համար: Հորս ազգանունը Ժմուռ է' բավական խելառ, բայց օրիգինալ», - ծիծաղելով ասում է երգչուհին:

Ծնողները միշտ էլ առանձնահատուկ հոգատարությամբ են շրջապատել իրենց դստերը: Մայրը' Լիդյա Կամենսկիխը, պատմում է. «Ամուսնուս համար Նաստյան արքայադուստր է եղել միշտ: Նա երբեք չի վիրավորել նրան, պատժել, անգամ ձայնը վրան չի բարձրացրել: Մենք արել ենք ամեն ինչ նրա լիարժեք կրթության համար: Նա այցելել է բալետի, վոկալի, ընթերցանության տարբեր խմբակներ և միշտ էլ տաղանդավոր է եղել»:

Երբ լրացել է փոքրիկի 6 տարեկանը, ընտանիքը տեղափոխվել է Ֆրանսիա, բայց Նաստյային դուր չի եկել այդ երկիրը, և ծնողները որոշել են տեղափոխվել Իտալիա: Լիդյայի խոսքով՝ երեքն էլ սիրահարվել են այդ երկրին, սովորել իտալերեն այն դեպքում, երբ մինչ այդ ընդունելիս չեն եղել որևէ լեզու բացի ուկրաիներենից:

Թեև Նաստյան վոկալով զբաղվել և երգել սկսել է վաղ տարիքից, փառքը նրա մոտ եկավ ավելի ուշ'2006-ից, երբ նա միացավ Պոտապի հետ, ու ստեղծվեց նրանց հայտնի դուետը: 2007-ին դուետը մասնակցեց Սոչիում անցկացված «Հինգ աստղ» մրցույթին ու հաղթող ճանաչվեց: «Ոչ զույգ» (Не пара) երգը դարձավ իրական հիթ:

Երկու գեղեցիկ, սեքսուալ, բայց և գիժ մարդիկ, ովքեր ներկայացնում են ռուսական էստրադան, բայց աջ ու ձախ հիշեցնում են. «Մենք Ուկրաինայից ենք, ու դա մեզ դուր է գալիս»: Դա ֆուրոր էր: Դուետի անունը պայթեց, ու մինչ օրս էլ նրանց աստղային ժամը չի անցնում: Նաստյան չի հերքում, որ երբեմն ունենում է աստղային հիվանդության պոռթկումներ. «Զգում եմ, որ ավելի պնդաճակատ եմ դարձել, ավելի ինքնավստահ: Այդպիսին է մեր բիզնեսը: Պետք է ունենալ կետի ատամներ, այլապես քեզ կխժռեն: «Աստղային հիվանդությունը» միայն հոգնածության, սովի, անքնության պահերին է արտահայտվում, երբ հեռու ես հայրենիքիցդ ու վաղուց չես տեսել սիրելիներիդ: Հիշում եմ' շրջագայություններից մեկի ժամանակ ես կուլիսներում սկսեցի հիստերիկի նման լացել, ասել, որ կարոտել եմ ծնողներիս ու ուզում եմ Կիև գնալ: Պոտապը մոտեցավ ինձ, գրկեք ու կատակեց' սա է արտիստի իդեալական կյանքը»:

Ինչ վերաբերում է Նաստյա Կամենսկիխ – Պոտապ համագործակցությանը, երգչուհին կարծում է, որ ինչպես ամեն բան, այնպես էլ այդ դուետը մի օր կվերանա, և իրենք կսկսեն առանձին երգել, բայց նաև հավելում է, որ դա կլինի ավելի ուշ, քանի որ հիմա իրենք իրական փառք են վայելում, ինչից հրաժարվելը հիմարություն է:

Դուետի պաշտոնական կայքում գրված է. «Սա երևույթ է շոու-բիզնեսում: Կոմպոզիտոր, պրոդյուսեր, ռեժիսոր ու շոումեն Պոտապի ու հրաշալի վոկալով գեղեցկուհի Նաստյայի համագործակցությունը չէր կարող այլ արդյունք ունենալ: Նրանք ամենա-ամենան են: Նրանց դուր է գալիս միայն այն, ինչ Ձեզ է դուր գալիս: Նրանք թողնում են ձևականություններն ուրիշներին ու բնականորեն ներկայանում Ձեզ: Պոտապն ու Նաստյան տաքը ու սառն են, սևն ու սպիտակը, ինը ու յանը»

Եվ իրոք, Նաստյային ու Պոտապին ճանաչում են ողջ ԱՊՀ տարածքում, նրանց երգերը երիտասարդական են,աշխույժ և բնական: Սա է նրանց հաջողության գրավականը: Վերջին հիթերից մեկը բացարձակ ցնորք է' նման հենց իրենց, անթարգամնելի' «Чумачечая Весна»:

Ու չնայած ողջ «գժությանը»'Նաստյային հաճախ են տրվում առաջին հորիզոնականներ ամենատարբեր մրցանակաբաշխություններում, որոնք վերաբերում են սեքսուալությանը, թեև երգչուհին պնդում է, որ իր համար կարևորը բնական լինելն է. «Ես չեմ ուզում խաղալ ոչ կյանքում, ոչ բեմին, ոչ ֆոտոխցիկների առաջ: Հաճախ ուղղակի արհեստական թարթիչներ եմ դնում ու էլ չեմ դիմահարդարվում: Դա շատ հարմար է: Այդ թարթիչներն անգամ խնամքի կարիք չունեն»:

Դեռևս մանուկ հասակնում Իտալիայում Նաստյան լուրջ քաշ էր հավաքել, ինչի մասին պատմում է միայն հիմա. «Իտալիան այն երկիրն է, որտեղ անկախ նրանից, թե ինչ ես ուտում, հավաքում ես կիլոգրամներ: Սնունդն է այդպիսին: Սա է պատճառը, որ, օրինակ, Ուկրաինայում շատ են նիհար աղջիկները: Մեզ մոտ սնունդն ու էկոլոգիան այնպիսին են, որ անկախ ուտելու քանակից չես գիրանում, իսկ իտալական սնունդը գիրացնող է: Հավատացեք' ես այնտեղ գրեթե չէի ուտում, բայց ինչ էլ որ ուտում էի, իր հետքն էր թողնում կազմվածքիս վրա: Իտալիայից հետ գալուց հետո ես բավական գեր էի, հիմա էլ ունեմ լուրջ խնդիրներ քաշիս հետ կապված ու չեմ թաքցնում դա»:

Եվ չնայած Նաստյայի ավելորդ կիլոգրամները ակնհայտ են, շատ պարբերականներ նրան համարում են ԱՊՀ տարածքի ամենասեքսուալ կինը: Դրանում ևս մեկ անգամ համոզվեցինք նրա վերջին ֆոտոսեսիաներից մեկից հետո: Աստղը մերկ լուսանկարվեց ռուսական «Փլեյբոյի» համար: Նրա երկրպագուները ոգևորված էին, բայց պարզվեց, որ Նաստիայի անձնական կյանքը լուրջ փոթորկվել է այդ ֆոտոսեսիայի պատճառով: Կամենսկիխը արդեն բավական ժամանակ է զուգընկեր ունի, ով դեմ է եղել նկարահանմանը: «Ես բնավ էլ հիացած չեմ, որ ցույց եմ տվել բարեմասնություններս: Ես ունեմ զուգընկեր, ով այնքան էլ կողմ չէր այդ ֆոտոսեսիային: Ստիպված եղա շատ բան զոհել հանուն այդ PR քայլի: Իսկ ինձ համար դա ընդամենը PR էր: Փառք Աստծո, մենք կարողացանք պայմանավորվել, ընդհանուր հայտարարի գալ, բայց շատ դժվար էր, մենք լուրջ կոնֆլիկտ ունեցանք, և ես էլ չեմ պատրաստվում շարունակել աշխատել այդ ոլորտում: Ինչ պետք էր, արդեն ցույց տվեցի»: Որոշ ժամանակ անց Կամենսկիխը ևս մեկ փակագիծ բացեց ու ասաց, որ ինքն ամբողջությամբ չի մերկացել ֆոտոխցիկների առաջ, իսկ ստացված լուսանկարները ենթարկված են ֆոտոշոփի:

Երգչուհու անձնական կյանքը այժմ հարթ է ընթանում, բայց ամուսնանալ Նաստյան դեռևս չի պատրաստվում. «Մենք երկուսս էլ հիմա ծանրաբեռնված աշխատում ենք: Միայն անձնագրում կարգավիճակի փոփոխության համար չեմ ուզում ամուսնանալ, իսկ երեխաներ ունենալ պատրաստվում եմ մի քանի տարի հետո միայն»:

Մի քանի անգամ հանդիպել եմ տարիքով շատ մեծ տղամարդկանց հետ, բայց այն պահին, երբ նրանք սկսել են սովորեցնել ինձ' ինչ անել, ձանձրացել ու հեռացել եմ: Շատ շնորհակալ եմ ներկա ընկերոջիցս, որ նա, թեև կապ չունի շոու բիզնեսի հետ ու տանել չի կարողանում այն, համակերպվում է, չի սարքում հիստերիկաներ ու խանդի տեսարաններ:

Եթե անգամ ես ու Պոտապը որոշենք մասնակցել Եվրատեսիլին, ապա միայն Ուկրաինան կներկայացնենք: Մենք չափազանց կապված ենք մեր ծննդավայրի հետ: Ինձ հաճախ են հարցնում' ինչու չեմ տեղափոխվում Ռուսաստան: Գուցե մի օր տուն կգնեմ այստեղ, բայց ապրել առանց Կիևի չեմ կարող:

Հիմա ողջ գումարս ծախսում եմ ծնողներիս վրա: Ամառանոց եմ կառուցում նրանց համար, ստեղծում հարմարավետ պայմաններ: Չգիտեմ… գուցե մի օր կսկսեմ իմ մասին էլ մի քիչ մտածել:

Ես, արդեն 4 օր է, ոչինչ չեմ կերել: Ջրով եմ ապրում: Ճարպերս այնքան շատ են, որ կբավականցնեն մի քանի բեռնաթափման օր:

Լարա Առաքելյան