Հայուհի Զառա Գեմիլյանը, որը ապրիլին ԱՄՆ-ի Քալֆորնիա նահանգում կայացած «Միսիս Քալիֆորնիա Երկրագունդ» գեղեցկության մրցույթում դարձել էր հաղթող, օրերս տեղի ունեցած «Միսիս Հյուսիսային Ամերիկա Երկրագունդ» մրցույթում նվաճել է «Վիցե Միսիս» տիտղոսը: Մցույթը կայացել է հունիսի 12-16-ն ընկած ժամանակահատվածում՝ Փալմ Սփրինգսում: Զառան նաեւ ճանաչվել է «Միսիս Հայաստան»՝ հնարավորություն ստանալով ներկայացնել Հայաստանը Չինաստանում կայանալիք «Միսիս Երկրագունդ» մրցույթում, որը կմեկնարկի նոյեմբերին:

NEWS.am STYLE-ը Քալիֆորնիայի ամենագեղեցիկ կինը ճանաչված հայուհու հետ զրուցել է մրցույթի մանրամասներից:

«Մրցույթն անց է կացվել մի քանի փուլերով: Առաջին փուլում մասնակիցներից յուրաքանչյուրը հանդես է եկել իր անձնական ելույթով՝ ներկայացնելով ինքն իրեն, ըստ որի էլ մյուս մասնակիցներն ու ժյուրիի անդամները պատկերացում են կազմում քո մասին: Հետագա փոլերում ներկայացել ենք լողազգեստներով եւ երեկոյան զգեստներով: Ես ներկայացել եմ տաղանդավոր հայ դիզայներ Aniko Fashion-ի հեղինակած զգեստով»,-ասում է Զառան՝ հավելելով.

«Ես շատ ուրախ եմ մրցութի արդյունքից եւ հպարտ, որ կարող եմ ԱՄՆ-ի պատվիրակության հետ մեկնել Չինաստան եւ ներկայացբել Հայաստանը: ԱՄՆ-ում մրցույթի կազմակերպիչները տեսան, թե ես ինչպես եմ ներկայացնում իմ երկիրը եւ որքան եմ հպարտանում իմ հայ լինելով, այդպես առաջարկեցին «Միսիս Երկրագունդ» մրցույթում ներկայացնել Հայաստանը, ինչն ինձ համար անակնկալ էր, բայց որի համար ես շատ ուրախ եմ եւ հպարտ»:

Զառան խոստովանում է՝ մրցակցությունը բարդ է եղել.

«Բոլոր մասնակցներն էլ գեղեցիկ էին, ինչպես արտաքուստ, այնպես էլ՝ ներքուստ: Բացի այդ, շատ ժամանակ էինք տրամադրում փորձերին: Մինչեւ հիմա ոտքերս ցավում են, քանի որ անընդհատ բարձրակրունկներով էինք շրջում»:

Այսօր Զառան ժամանելու է Հայաստան. այստեղ զբաղվելու է Չինաստանում կայանալիք մրցույթի նախապատրաստական աշխատանքներով:

Սյունե Առաքելյան