Կարելի է առանձնացնել ծանոթությունների եւ դրան հաջորդող հարաբերությունների 2 շատ տարբեր, բայց շատ անհաջող ռազմավարություն՝ վերջին տղամարդու համախտանիշ եւ աստղի համախտանիշ։ Վերջին տղամարդու համախտանիշով տառապող կանայք ապրում են լայն բացած դռներով։ «Իմ երազանքի» տղամարդ է դառնում ցանկացածը, ով գոնե այդ դռան շեմից ներս է մտնում, այսինքն՝ գնում է 2-րդ ժամադրությանը։
Նման կանանց մոտ բացակայում է զուգընկերոջը քննադատաբար ընկալելու հատկությունը։ Եթե սեքս է լինում, եւ նրա տանը հայտնվում է այդ տղամարդու ատամի խոզանակը, ուրեմն վերջ․ այդ կնոջ խելքը վերջնականապես գլխից թռնում է։ Նա անմիջապես սկսում է երկար ընտանեկան կյանքի պլաններ կազմել։ Կարեւոր չէ, որ ատամի խոզանակից բացի, տղամարդն այդպես էլ ուրիշ բան այդ տուն չի բերում։ Հարցեր չեն տրվում, տղամարդու մտադրությունները չեն պարզվում։ Կինը կարող է հարցնել, թե ինչ է մեր միջեւ կատարվում, իսկ տղամարդը կարող է ի պատասխան անորոշ ինչ-որ բան քրթմնջալ քթի տակ, բայց դա էլ բավարար է, որ կինը դա ընկալի որպես «ամեն բան կարգին է, մենք զույգ ենք»։ Սովորաբար այս հարաբերությունների զարգացումը կախված է տղամարդու հետաքրքրվածության աստիճանից եւ դաստիարակությունից։ Հետաքրքրվածությունը երկար չի դիմանում, իսկ դաստիրակությունն էլ թույլ է տալիս միայն կարճ հաղորդագրություն թողնել՝ «կներես» բովանդակությամբ։
Աստղի համախտանիշով կանայք, ընդհակառաակը, ոչ միայն քննադատաբար են մոտենում, այլեւ շատ քմահաճ են։ Նրանք սպասում են օրիգինալ եւ խորհրդավոր ծանոթության։ Նրանք ֆիքսված են տարբեր ծիսակարգերի վրա։ Որպեսզի նա ուշադրություն դարձնի ձեզ վրա, դուք պետք է հատուկ հաղորդագրություն ուղարկեք նրան, այլ ոչ թե պարզապես գրեք՝ բարեւ։ Առաջին ժամադրության պետք է հրավիրեք գիշերը եւ տանեք Բուլգակովի թանգարան, իսկ երրորդին անպայման դեղին քրիզանթեմներ բերեք։ Սեքսը՝ միայն 7-րդ ժամադրությունից հետո եւ Դրակուլայի ամրոցում։ Աստված չանի, տղամարդն առաջին հանդիպմանը կակաչներ նվիրի եւ հրավիրի սուրճ խմելու մոտակա սրճարանում։ Նա անմիջապես հայտնվում է սեւ ցուցակում։ Չէ՞ որ այդ կինը սուպերանհատականություն է եւ չի կարող նման հասարակ բաներով զբաղվել։
Ե՛վ առաջին, եւ՛ երկրորդ տեսակի կանայք սովորաբար միայնակ են մնում։ Առաջիններից մշտապես փախչում են տղամարդիկ, իսկ երկրորդներին մոտ չեն գնում։ Առաջին տեսակի կանայք իրենց թերագնահատում են, իսկ երկրորդները՝ գերագնահատում։ Երկուսն էլ վախենում են մտերմությունից, բայց ամեն մեկը՝ յուրովի։ Առաջինները կլանում են տղաամարդուն, որպեսզի նա սիրի իրենց բոլոր նրանց փոխարեն, ովքեր այդ կնոջը չեն սիրել։ Միայն թե այդ տղամարդը սիրում է, իսկ կինը չի հավատում, քանի որ ինքն իրեն չի սիրում եւ չի հավատում, որ իրեն հնարավոր է սիրել։
Աղբյուրը՝ Kleo
