Exclusive

 

Լրագրողուհի, հաղորդավարուհի Նանե Արզումանյանը որոշել է ուժերը մեկ այլ՝ դերասանական ոլորտում փորձել: «Անցյալ». այսպես է կոչվում այն հեռուստասերիալը, որի գլխավոր դերում սիրված հեռուստահաղորդավարուհին հանդիսատեսին կներկայանա մեկ այլ ռակուրսից.

Image may contain: 1 person, outdoor

«Սերիալում մոտավորապես մեկ տարի առաջ եմ սկսել նկարահանվել: Դրանից առաջ մի քանի գեղարվեստական ֆիլմերից առաջարկներ ստացել եմ, ու էլի գլխավոր դերեր են առաջարկել, բայց ես մերժել եմ՝ մտածելով, որ ամեն մարդ իր գործով պետք է զբաղվի. ես մասնագիտությամբ լրագրող եմ և որևէ առնչություն չունեմ դերասանական ոլորտի հետ: Բայց ժամանակներն ու մարդկային մտածելակերպը փոխվում են: Ինձ համար պրոֆեսիոնալ մարդիկ՝ թե՛ իմ սերնդակիցները, թե՛ նոր սերնդի ներկայացուցիչները այս ոլորտից ինձ քաջալերեցին, ոգևորիչ խոսքեր ասացին, և ես մտածեցի՝ ինչու ոչ, կարելի է նաև այս ասպարեզում ուժերը փորձել», - Past.am-ի հետ զրույցում նշեց Նանեն:

Image may contain: 3 people, people sitting and child

 

50 սերիայից բաղկացած սերիալի պրեմիերան տեղի կունենա մայիսին:

«Սերիալում ես մարմնավորում եմ գլխավոր կերպարին, ով նույնպես Նանե անունն է կրում: Համաձայնեցի հենց այս դերով մուտք գործել դերասանական ասպարեզ, քանի որ այստեղ ես բացարձակապես չեմ խաղում: Կերպարս բավականին մոտ է ինձ իրական կյանքում՝ աղջիկ, ով սեփական ուժերով՝ միայնակ, առանց ծնողների կամ ինչ-որ մարդկանց օգնության, հասնում է ամեն ինչի ու պայքարում այն աղջիկների դեմ, ովքեր փորձում են խանգարել իր գործունեությանը:

Image may contain: 1 person

 

Խաղընկերս Հայկ Աֆրիկյանն է, ով մտածում է, որ Նարեն կարիերիստ է, ու սկսվում են դժվարությունները: Հակինթ Բաղդասարյանը ֆիլմում մարմնավորում է իմ պրոդյուսերին: Դերասանական կազմից կուզենայի առանձնացնել նաև նոր սերնդից Կոլյա Եղիազարյանին, ում շատերը որպես դերասան չեն ճանաչում, բայց, կարծում եմ, իր սերնդակիցների մեջ նա որակական առումով շատ է տարբերվում»:

Նանեի խոսքով՝ դերասանական կրթություն չունենալն, այնուամենայնիվ, փոքրիկ բարդություններ է ստեղծել իր առջև, որոնք կարողացել է պատվով հաղթահարել.

«Սկզբնական շրջանում ես կարծում էի, որ ոչինչ չեմ կարող անել, բայց երբ հասկացա, որ կերպարն ինձ հոգեհարազատ է, ամեն ինչ հեշտացավ: Ինձ նաև իմ հաղորդավարական ու լրագրողական դիկցիան էին խանգարում, բայց աստիճանաբար դրանք էլ սկսեցին շտկվել, ինչում ինձ շատ օգնեցին իմ կոլեգաների խորհուրդները: Այս առումով երախտիքի ամենամեծ խոսքս Հակինթ Բաղդասարյանինն է, քանի որ նրա ընդամենը «Դու կարող ես և վերջ» խոսքերը շատ մեծ ազդեցություն ունեցան:

Image may contain: 2 people, indoor

 

Դերասանի կարիերա սկսելուն զուգահեռ Նանեն չի պատրաստվում մոռանալ իր հիմնական մասնագիտությունը.

«Այս պահին մեկ այլ հեռուստաընկերությունից առաջարկ կա՝ նոր, շատ մեծ պրոյեկտի, որը, մի փոքր չակերտները բացեմ, ինտելեկտուալ մրցույթի ձևաչափով է լինելու: Բացի դրանից՝ մեկ այլ պրոյեկտ էլ կա, որը ես եմ վարելու: Նույն հեռուստաընկերությամբ կցուցադրվի նաև ֆիլմ, որի գլխավոր դերերից մեկում դարձյալ ես կլինեմ»:

 

Մարիամ Նալբանդյան