Ամեն օր նոր սերիալներ, նոր դեմքեր ու հանդիսատեսին ոչ ծանոթ դերասաններ, ովքեր միանգամայն այլ մասնագիտություն ունեն: ESem.am-ն առանձնացրել է և այսուհետև ներկայացնելու է այլ մասնագիտությամբ դերասանների, ովքեր այս շրջանում ընդգրկված են տարբեր հեռուստասերիալներում, ֆիլմերում: Ի դեպ, նրանցից շատերը քննադատվում են հենց մասնագիտական կրթություն չունենալու և վատ դերակատարման համար. այնպես որ, կարող եք մեկնաբանությունների հատվածում թողնել Ձեր կարծիքը՝ նշելով, թե ում մասնագիտական կրթության բացն է առավել ակնհայտ:

 

Մարինկա Խաչատրյան

Անցած տարվանից հեռարձակվող «Սիրո գերին» սերիալում մեզ ողջունում է անուշիկ արտաքինով մի աղջիկ, ով մինչ այս անծանոթ էր հեռուստադիտողին: Արփիին մարմնավորող 17-ամյա Մարինկա Խաչատրյանը դպրոցն ավարտելուց հետո դիմահարդարման դասընթացների է գնացել, իսկ այժմ իր ուղին շարունակում է որպես դերասանուհի: Նրա խոսքով` գուցե առաջիկայում ընտրի այս մասնագիտությունն ու ավելի հաճախ իր խաղով հյուր գնա հեռուստադիտողին:

 

 

Միհրան Ծառուկյան

Երգիչ Միհրան Ծառուկյանը տարիներ առաջ սկիզբ դրեց նաև իր դերասանական կարիերային` առաջին անգամ նկարահանվելով «Դժվար ապրուստ» սերիալում: Այստեղ մարմնավորելով գլխավոր հերոսին` Միհրանը սիրվեց նաև որպես հեռուստատեսային դեմք` սերիալային դերասան: Դերասանական խաղը համատեղելով երգչի կարիերայի հետ՝ Միհրանը մոտ երկու տարի եթերում էր, որից հետո դադար վերցրեց, այժմ կրկին նկարահանվում է «Ֆուլ հաուս» հումորային նախագծում:

 

 

 

Ալինա Մարտիրոսյան

Արդեն մի քանի տարի է` հնարավորություն ունենք հետևելու Խ.Աբովյանի անվան մանկավարժական համալսարանի Հոգեբանության ֆակուլտետն ավարտած Ալինա Մարտիրոսյանի խաղին: Մինչ որպես դերասանուհի ներկայանալը Ալինան նաև մոդելային կարիերա է ծավալել, մասնակցել է «Միսս Հայաստան» մրցույթին: Նա նկարահանվել է ինչպես սերիալներում, այնպես էլ գեղարվեստական ֆիլմերում. դրանցից են «Պահանջվում է միլինոատեր» ֆիլմը, «Անուրջներ», «Եղբայրներ», «Մամա» սերիալներն ու «Տնփեսա» սիթքոմը: Այժմ Ալինան նկարահանվում է «Լույսի պահապանը» սերիալում:

 

 

 

Մանանա Գևորգյան

Օրեր առաջ եթերում հայտնվեց նոր սիթքոմ`«Խոպանի տեսություն», որում նկարահանվում է նաև Մանանա Գևորգյանը: Նա ևս մասնագիտական բարձրագույն կրթություն չի ստացել, սակայն, նրա խոսքով, հասցրել է դերասանի  վարպետության անհատական դասեր առնել: Բացի սերիալային գործունեությունը, Մանանան զբաղվում է պարով. իր անվամբ կոչվող պարային ստուդիայի գեղարվեստական ղեկավարն ու պարուսույցն է:

 

 


Ներկայացրեց Արևիկ Իսաջանյանը